Ísraelski herurin sigur, at Iran hevur sent yvir 300 dronur og rakettir.
Sambært herinum vórðu yvir 99 prosent av teimum skotnar niður.
Tað skrivar tíðindastovan Reuters.
Ísraelski herurin sigur harumframt, at vápnaðu deildirnar enn eru fult stríðsfúsar, og at tað nú verður tosað um, hvørjir møguleikar eru fyri »uppfylgingum«.
Í sjónvarpsrøðu sigur Daniel Hagari, talsmaður fyri herin, at gerðirnar hjá Iran eru »ógvuliga álvarsamar«, og at Iran »ger støðuna í økinum spentari«.
Fyrr hevur herurin upplýst, at Bretland og USA hava hjálpt við at skjóta dronurnar niður.
Umframt dronur og rakettir, sum eru sendar úr Iran, sigur herurin sambært Reuters, at tað eisini varð skotið úr Irak og Yemen.
Herurin hevur enn ikki sett orð ella tøl á, ítøkiliga hvat sambært Ísrael var skotið úr hesum londum.
Trygdarfelagið Ambrey segði í nátt við AFP somuleiðis, at tað eru sendar dronur úr Yemen ímóti Ísrael samskipað við Iran. Tað varð sagt, at tað helst er houthirørslan, sum stendur aftanfyri hesar.
Álopið í gjár varð framt, eftir at tað í fleiri dagar hevði ljóðað, at eitt iranskt álop á Ísrael nærkaðist.
Kollveltingarherurin í Iran (IRGC) váttaði í gjárkvøldið sjálvt álopið. Sambært kollveltingarherinum er átakið, sum verður nevnt »True Promise«, ein partur av revsingini fyri ísraelsku brotsgerðirnar, her undir eitt álop á iranska konsulátið í sýriska høvuðsstaðnum damaskus 1. apríl.
Ísrael hevur fyrr í morgun upplýst, at minst eitt barn er sært undir loftálopunum. Harafturat er ein hernaðarlega í syðra parti av Ísrael rakt.
Enn eru ikki aðrir upplýsingar komnir um særd ella um skaðar á undirstøðukervi.
/ritzau/
