Í gjár, hósdagin 30. januar, rakk Jógvan við Keldu teimum 70. Jógvan er klaksvíkingur við stórum K, og hann hevur í mong ár verið við til at sett dám á lívið í heimstaðnum, sum hann eisini hevur umboðað úteftir.
Foreldrini hjá Jógvani við Keldu vóru Gigga og Theodor við Keldu. Hon var ættað av Kirkju, men vaks upp hjá Elsubu og Jóan Jakku av Viðareiði, sum hevði útgerðarfelag og handil í Klaksvík. Í hesum felagnum arbeiddi Theodor við Keldu, sum var ættaður úr Leirvík og hevði verið eitt stutt skifti á posthúsinum í Klaksvík, áðrenn hann kom til Jóan Jakku. Gigga og Theodor gjørdust góð og giftust. Tey fyrstu árini búðu tey í Vági, og tíðliga í fimmti árunum fluttu tey norður á Garðar. Tá var Jógvan stórur smádrongur, og hann hevur síðani búð á Gørðum.
Gigga og Theodor fingu trý børn: Regin býr niðri, og Jógvan og Ásla búgva í Klaksvík. Jógvan við Keldu giftist í 1965 við Betty Skaale av Toftum. Tey bygdu niðanfyri hjá Giggu og Theodor. Betty og Jógvan eiga trý børn: Gunvá, Pætur og Tóra, sum øll búgva í Klaksvík.
Sum blaðungur arbeiddi Jógvan á Bollafabrikkini hjá Kjølbro, har John Høj var stjóri. Síðani var hann á kontórinum hjá Kjølbro. Jógvan droymdi um at eiga og reka sína egnu fyritøku, og hann var ikki meiri enn átjan ára gamalur, tá ið hann hevði fingið fyrsta umboðið. Tey fyrstu árini seldi hann tuflur, klæði, mjøl og sukur og so mangt annað, men so legði hann seg eftir serligum vørusløgum. Eitt nú PG te og ymisk sløg av keks og góðgæti. Jógvan dugdi at síggja, at tað hevði stóran týdning at hava gott samband við viðskiftafólkini. Hann gav Handilstíðindi út, hann skipaði fyri skeiðum heima á landi og ferðaðist saman við keypmonnum í Danmark, og hann var miðskeiðis í seksti árunum við til at skipa fyri fyrstu vørumessunum í Klaksvík.
Seinni skifti Firma og seinni Partafelag Theodor við Keldu, sum heilsølan hjá Jógvani nevndist, soleiðis, at teir løgdu seg eftir at selja IBM skrivimaskinur, IWO frystidiskar, Hasler og Tec kassaapparat og Divus vektir. Hvat hesum vørusløgunum viðvíkur mundi Theodor við Keldu vera millum teir fremstu í landinum síðst í seksti árunum og fyrst í sjeyti árunum. Áðrenn Jógvan av álvara fór upp í politikk, fóru teir at selja bilar og maskinur, og í 1983 helt fyritøkan uppat. Svágurin og vinmaðurin, Leivur Fonn, fór at reka sína fyritøku við fleiri av vørunum, sum Jógvan frammanundan hevði umboðað.
Longu í 1970 varð Jógvan við Keldu fyrstu ferð valdur í Klaksvíkar býráð. Tá varð hann valdur á fólkaflokslistanum saman við Hans Andreasi Jacobsen, sála. Eftir fyrsta skeiðið í býráðspolitikki stillaði Jógvan ikki uppaftur. Men hann mundi vera væl og virðiliga bitin av politikkinum. Í 1980 bjóðaði hann seg fram bæði til løgtingsvalið og býráðsvalið, sum vóru hetta heystið. Á fólkaflokslistanum til løgtingsvalið kappaðist hann við Anfinn Kallsberg um at vinna sessin eftir Hákun Djurhuus, sála, sum ikki stillaði uppaftur. Anfinn vann, men tað var tepurt, tí munurin var bara tvær atkvøður.
Á fólkaflokslistanum til býráðsvalið hetta sama árið duldi Jógvan ikki fyri, at hann ætlaði sær at verða formaður, og tað eydnaðist. Hann var formaður í átta ár. Í 1988 tók hann seg aftur, men í 1992 varð hann afturvaldur, og tá var hann aftur formaður í tvey valskeið. Hann var sostatt býráðsformaður í 16 ár og tað er framvegis met í Klaksvík.
Hóast Jógvan var landspolitikari í fleiri ár, so fjaldi hann ongantíð, at tað, sum lá honum næst, var at sita í fremsta politiska sessinum í Klaksvíkar býráði
Jógvan er fryntligur og hugnaligur at vera saman við. Sjálvt um hann kann gera onkran vørrin við hvørt, so hevur hann eitt lætt og ljóst sinni, og tað vóru góðar dygdir at hava, tá ið hann skipaði fyri í Klaksvík og umboðaði býin. Jógvan varð valdur á ting í 1988. Í fyrsta umfarinum var hann tvey ár í løgtinginum. Fínteljingin eftir valið í 1990 vísti, at eykavaldi fólkafloksmaðurin var valdur í Suðurstreymi og ikki í Norðoyggjum. Í 1994 var Jógvan ikki á listanum. Í 1998 varð hann valdømisvaldur tingmaður, og tað var hann eisini í 2002 og í 2004, tá ið hann eitt skifti var landsstýrismaður.
Millum politisku málini, sum føðingardagsbarnið gekk mest uppí, vóru sjúkrahúsið í heimbýnum og samferðsluviðurskiftini. Tað er einki at taka seg aftur í, at hann gekk undan og var áhaldandi í stríðnum at vinna norðoyingum fast samband um Leirvíksfjørð.
Í meiri enn eina hálva øld hevur Jógvan nýtt sínar musikalsku gávur í samkomuni í Betesda. Sum stórur drongur fór hann at spæla orgul í sunnudagsskúlanum, hann hevur spælt á møtunum í fleiri enn 55 ár, og hann hevði ábyrgdina av sangkórinum í væl meiri enn fjøruti ár. Framvegis stjórnar hann Seytjan sangarum.Jógvan hevur komponerað, sett út og yrkt. Tey, sum hava skil á tí, siga, at hann er eitt nátúrtalent í musikkinum. Tær umstøðurnar, sum musikkáhugað nú á døgum hava at fara aðra staðni at nema sær kunnleika, vóru ikki, tá ið Jógvan var ungur. Men Jógvan hevur avrikað nógv við teimum musikkevnunum, sum hann hevur fingið frá Skaparans hond, og hann hevur eisini stríðst fyri at fáa í lag og betr umstøðurnar hjá Klaksvíkar Musikkskúla.
Tá ið so nógv er á skránni, kundi tað kanska bent á, at stundir ikki vóru til annað enn sang, tónleik og arbeiði. Hóast hann er pensionistur, so er Jógvan framvegis hvønn dag á skrivstovuni, og hann gongur nógv í náttúruni. Betty og hann eiga eitt fyrimyndarligt heim, har gestablídni og Gudsótti altíð hava verið sett í hásæti.
---
J
