Jørgen vann

Jørgen Niclasen vann sakarmálið ímóti teimum fýra blaðfólkunum

Jørgen Niclasen, landsstýrismaður í fíggjarmálum, vann sakarmálið ímóti teimum fýra journalistunum.

Hann stevndi tey fyri ærumeiðing í kjalarvørrinum á tollmálinum, har hann var lagdur undir at hava snýtt í tolli.

Og Føroya Rættur hevur nú dømt Liljuna Weihe tíðindaleiðara í Kringvarpinum, og Dia Midjord stjóra í Kringvarpinum, 20 dagbøtur á 1.000 krónur, ella 20.000 krónur í bót í part.

Jan Lamhauge journalistur í Kringvarpinum fær 10 dagbøtur á 1.000 krónur, ella 10.000 krónur í bót og Sveinur Tróndarson, sum var á Portalinum, tá ið málið var uppi, fær eisini 20 dagbøtur á 1.000 krónur, ella 20.000 krónur í bót.

Tey skulu eisini rinda Jørgen Niclasen 50.000 krónur í endurgjaldi fyri tort og sviða,  tó skal Jan Lamhauge í mesta lagi rinda 5.000 krónur.

Harumframt skulu tey rinda Jørgen Niclasen 75.000 krónur í sakarmálskostnaði.

Samstundis er tað, sum er sagt og skrivað um Jørgen Niclasen í hesum máli, dømt deytt at vera.