John helt tørn ímóti stórmeistara

Telvarar eru sermerkt fólkaslag. Síðani mánakvøldið hava teir sitið pinnastillir og kríggjast í Løkshøll. Góðir og royndir føroyskir telvarar saman við ungum og onkrir heilt óroyndir hava luttikið í kapping saman við útlendskum telvarum. Summir av hesum teljast millum stórmeistararnar, sum ferðast kring heimin og luttaka í nógvum kappingum.

Hóast teir hava sitið sum á nálum, so hevur tað verið kríggj á talvborðunum. Eftir lokið stríð eru teir farnir úr fínu Løkshøll og inn í kantinuna, har teir hava fingið at eta og drekka, og har tað hevur verið møguleiki at fylgja við á stórskíggja, hvussu tað hevur gingið í talvunum, sum ikki hava verið liðug. Og so hava teir samstundis tikið í góðum vinalagi tikið talvið ígjøgnum aftur, sum lítla løtu frammanundan var krígsstøða.

Í kvøld var onnur Runavík Open kappingin av. So bjóðaði Runavíkar kommuna til døgurða, áðrenn endahaldið var í høllini. Mánakvøldið var tað borgarstjórin Torbjørn Jacobsen, sum bjóðaði vælkomið. Í kvøld var talváhugaði borgarstjórin aftur á staðnum og handaði sigurslønirnar, og samstundis boðaði hann frá, at um eitt ár verður Runavík Open í talvi aftur á skránni.

Tað endaði, sum tað undan síðsta umfari var roknað við. GM Nikita Mariro (2521) úr Hvítarusslandi og GM Oleg Korneev (2553) úr Russlandi samdust skjótt um remis. So var tað greitt, at 32 ára gamli Nikita Maiorov hevði vunnið kappingina.

Hann endaði eitt heilt stig frammanfyri fimm teir teir næstu – fýra stórmeistarar og ein altjóða meistara.

Ein teirra var Oleg Korneev, og ein annar var indiski stórmeistarin Srinath Narayanan (2517), sum í dag telvaði javnt ímóti kinesiska stórmeistaranum Xu Yinglun (2518).

Ein annar var GM Igor Khenkin (2552) úr Týsklandi, sum í dag vann við svørtum ímóti GM Stanislav Savchenko (2479) úr Ukreina.

IM Yi Xu (2465) úr Kina vann í dag við hvítum ímóti unga íslendinginum Vignir Vatnar Stefansson (2294) og lyfti seg harvið upp undir liðina á omanfyri nevndu.

Ein annar var 13 ára gamli indarin IM Sarin Nihal (2487), sum í dag vann við svørtum ímóti FM Filip Boe Olsen (2267) úr Danmark.

Sunnudagurin vignaðist væl hjá bestu føroysku luttakarunum.

IM John Rødgaard (2332) telvaði við svørtum ímóti indiska stórmeistaranum Tejas Bakre (2456), og tað endaði remis.

FM Høgni Egilstoft Nielsen (2354) vann við svørtum ímóti Simon Thórhallsson (2059) úr Íslandi, og FM Rógvi Egilstoft Nielsen (2340) vann við hvítum ímóti Kristjan Edvardsson (2192) úr Íslandi.

Høgni Egilstoft Nielsen vann 5 ½ stig og endaði á átjanda plássi, sum var nett tað plássið, hann undan kappingini var styrkismettur til.

Rógvi Egilstoft Nielsen vann 5 ½ stig og endaði á nígjanda plássi, sum var nett tað plássið, hann undan kappingini var styrkismettur til.

John Rødgaard vann 5 stig og endaði á 22. plássi. Hann var undan kappingini styrkismettur til 20. pláss.

9. Runde d. 2017/11/26 kl. 14:00

Slut placering efter 9 runder