Eftir eina heldur slaka byrjan upp á kappingarárið, hevur KÍ rættiliga fingið ferð á seinastu vikurnar, og nú bjóða klaksvíkingar av í toppinum í Effo-deildini.
Sunnudagin var ÍF á vitjan í Klaksvík, og trý stig vóru á muni millum tey bæði feløgini, sum eru í hølunum á oddaliðnum EB/Streymi.
Dysturin í Klaksvík var ikki av teimum bestu, og serliga í fyrra hálvleiki var tað ÍF, sum vísti meira enn heimaliðið. KÍ fekk ongantíð veruligt flog á sítt spæl, men klaksvíkingar vóru vandamiklari enn fuglfirðingar og høvdu teir størstu kjansirnar.
Páll gongur undan
Páll A. Klettskarð hevur gjørt fleiri týðandi mál fyri KÍ seinastu vikurnar. Tað var hann, sum setti gongd á KÍ, tá ið klaksvíkingar vunnu fyrsta dystin í Effo-deildini, og tað er Páll, sum fleiri ferðir hevur gjørt avgerandi mál seinastu umførini.
Og Páll var aftur upp á spæl sunnudagin. Andy Olsen legði inn fyri, og so kundi Páll stúta bóltin í málið. Hetta var í fyrra hálvleiki, og tá ið liðini komu út eftir steðgin, varð roknað við, at ÍF fór at trýsta fyri at gera mál.
ÍF gjørdi eisini eina roynd, men spælið var ikki eins gott í seinna hálvleiki, og fuglfirðingar høvdu trupulleikar við at skapa málmøguleikar. Páll A. Klettskarð hevði hinvegin tveir risamøguleikar afturat at skora, men Jákup Mikkelsen vardi fyri.
Seinastu løtuna sendi ÍF verjuspælaran Bartal Eliasen fram í álopið, men deyðbóltar og innlegg høvdu ikki so góða góðsku, at Bartal veruliga kundi brúka sína styrki við høvdinum.
Dysturin fjaraði út, og klaksvíkingar vóru væl nøgdir við tey trý stigini, sum teir vunnu, hóast teir ikki høvdu spælt sína besta dyst. Tað líkist einum toppliði – og tað er tað, KÍ er í løtuni
