KÍ er aftur á tindinum

Tað er sera gott lag í Klaksvík í kvøld. Í gjár fegnaðust tey yvir, at FM í kvinnufótbólti er komið heimaftur, sum tey siga, og í dag fegnast tey um, at tað lagaði seg so mikið væl fyri teirra lið í dag, at KÍ nú tað resta trý umfør er topplið.

ÍF vísti seg at vera alt annað enn botnlið, sum einki hevur at spæla fyri. Fuglfirðingar stríddust, og teir vóru fleiri ferðir í seinna hálvleiki við at skora og javna, men KÍ reið stormin av og vann 3-0. Breiddin á KÍ liðnum vísti seg at hava stóran týdning.

KÍ og B36 eru jøvn í stigum, men málmunurin hjá klaksvíkingum er betri, enn hann er hjá B36.

Tað kann fara at vísa seg at hava avgerandi týdning í kappingini um FM, at B36 í síðstu atsóknini av øllum ímóti HB javnaði til 2-2. Benjamin Heinesen skoraði bæði B36 málini, meðan fyrra HB málið var sjálvmál og Brynjar Hlöðversson eftir horna skoraði tað seinna.

Í Runavík legði NSÍ fyri triðju ferð á rað rygg til heimatap. 2-0 Víkingasigurin ber við sær, at FM møguleikin hjá NSÍ er burtur. Nú snýr tað seg um at halda tørn um triðja plássið, bronsukrónurnar og rættin at luttaka í Europa næsta summar.

Sigurin ber við sær, at Víkingur framvegis hevur møguleika at røkka plássi í europeisku kappingini næsta summar. Andreas Lava Olsen legði beinanvegin Víking framum, og Philip Djordjevic staðfesti sigurin.

Víkingur var meiri ágangandi í álopsspælinum, enn víkingarnir ofta plaga at vera, og hjá NSÍ vísti tað seg at vera striltið at finna rætta lagið.

Bæði Skála og EB/Streymur vunnu á útivølli. EB/Streymur vann á útivølli ímóti TB, sum legði seg fram við fínum langskoti, sum Rógvi Joensen stóð fyri. Ragnar Samuelsen javnaði, og Arnbjørn Hansen syrgdi við stútara eftir fríspark fyri, at EB/Streymur hevur øll stigini norður aftur við sær.

Á Argjum legði Jákup Johansen Skála framum, og Haraldur R. Højgaard økti um munin til 2-0 við brotssparki. Lukas Giessing hevði stóran møguleika undan steðginum at minka um munin, men Karstin Hansen í Skálamálinum bjargaði brotssparkinum.

KÍ – ÍF 3-0 (1-0)

1-0: Torbjørn Grytten

2-0: Jóannes Bjartalíð

3-0: Patrik Johannesen

NSÍ – Víkingur 0-2 (0-1)

0-1: Andreas Lava Olsen

0-2: Philip Djordjevic

B36 – HB 2-2 (0-1)

0-1: sjálvmál

1-1: Benjamin Heinesen

1-2: Brynjar Hlöðversson

2-2: Benjamin Heinsen

AB – Skála 0-2 (0-2)

0-1: Jákup Johansen

0-2: Haraldur R. Højgaard br

TB – EB/Streymur 1-2 (1-1)

1-0: Rógvi Joensen

1-1: Ragnar Samuelsen

1-2: Arnbjørn Hansen

Leygardagin 5. oktober

25. umfar

EB/Streymur - B36

ÍF - AB

Víkingur - KÍ

Skála - TB

HB - NSÍ