Fýra dystir eru spældir í Effodeildini. Fyrsti dysturin í hesum umfarinum varð spældur í gjár ímillum Skála og Víking. Hesin dysturin endaði við sigri til Víking, sum endaði 1-3. Álvur Christiansen legði Skála á odda við brotssparki, men víkingarnir komu sterkt aftur. Andrias Lava Olsen javnaði í fyrra hálvleiki, og í seinna hálvleiki avgjørdi Hans Pauli Samuelsen dystin við tveimum málum.
Sigurin hjá Víkingi merkti fyri KÍ og B36, at hesi lið skuldu vinna sín dyst í dag fyri at standa sum oddalið eftir 12. umfar í Effodeildini. Í Klaksvík vann KÍ favorittsigur ímóti TB við máli, ið Jóannes Bjartalíð skoraði longu í fyrsta minutti. Harvið er KÍ einsamalt oddalið í Effodeildini.
Verri gekk hjá B36, sum í Fuglafirði ikki fekk meira enn javnleik - 0-0. Talan var um rættiliga linligan dyst.
Í Gundadali var sonn málveitsla, har HB tók ímóti NSÍ. Runavíkingarnir kundu fara glaðir og væl nøgdir til hálvleiks við støðuni 0-2 - Pól Johannus Justinussen og Klæmint Andrasson Olsen skoraðu málini í fyrra hálvleiki. Í hálvleikinum bleiv Poul Ingason settur á vøllin hjá HB, og hendan útskiftingin gjørdi knasandi góðan mun, tí at Poul Ingason skoraði tvey mál í teimum 45 minuttunum, sum hann spældi í dag. Tað rakk tó ikki til stig, tí at Petur Knudsen og aftur Pól Johannus Justinussen skoraðu fyri NSÍ. Øssur Dalbúð minkaði í yvirtíðini um munin, men endaliga úrsltiið gjørdist 3-4 til NSÍ.
Á Svangaskarði var satt botnbrak ímillum B68 og AB. Her stevndi AB ímóti sigrinum ein stóran part av dystinum. Bert 17 ára gamli Bjarki C. Nielsen legði AB á odda í fyrra hálvleiki, og stutt eftir hálvleikssteðgin økti Patrik Johannesen til 2-0. Toftamenn komu tó sterkt aftur, tí at við málum frá Hákuni Edmundssyni og Michal Przybilski tryggjaðu teir sær eitt stig. Tað endaði 2-2 á Toftum.
Eftir 12 umfør er stigatalvan í Effodeildini nú hendan:
1. KÍ 26 stig
2. Víkingur 25 stig
3. NSÍ 24 stig
4. B36 24 stig
5. HB 18 stig
6. ÍF 15 stig
7. AB 9 stig
8. Skála 9 stig
9. TB 9 stig
10. B68 5 stig.
Hagtølini frá dagsins umfari kunnu síggjast niðanfyri:
HB-NSÍ 3-4 (0-2)
0-1: Pól Johannus Justinussen 09.
0-2: Klæmint Olsen (brotsspark) 40.
1-2: Poul Ingason 51.
1-3: Petur Knudsen 58.
2-3: Poul Ingason 62.
2-4: Pól Johannus Justinussen 75.
3-4: Øssur Dalbúð (brotsspark) 90.
KÍ-TB 1-0 (1-0
1-0: Jóannes Bjartalíð 1.
B68-AB 2-2 (0-1)
0-1: Bjarki C. Nielsen 28.
0-2: Patrik Johannesen 53.
1-2: Hákun Edmunsson 55.
2-2: Michal Przybilski 63.
ÍF-B36 0-0
