Áki Joensen gjørdist spastikari vegna trupulleikar undir føðingini og er rørslutarnaður, men uppvøkstur hevur hann fingið á sama hátt sum flest onnur. Hann hevur gingið í barnagarði, fólkaskúla og fekk summarið 2002 studentsprógv í studentaskúlanum í Hoydølum. Hann gjørdist ársins studentur hetta árið. Undir lesnaðinum fekk hann eisini koyrikort og egnan sergjørdan bil.
Áki flutti árið eftir til Danmarkar og er í dag búsitandi í Aalborg, har hann má sigast vera ítróttarmaður fulla tíð. Hann man vera ein av teimum fáu, sum kann erpa sær av at vera á tveimum landsliðum í tveimum ymiskum ítróttargreinum. Nevniliga koyristólafótbólti, har hann umboðar Danmark, og boccia umboðandi Føroyar.
Hevur verið til HM
Áki hevur altíð verið áhugaður í fótbólti.
– Eg havi altíð viljað spælt fótbólt. Eg var altíð málmaður, tá ið vit spældu bólt í skúlanum, men tá ið eg bleiv eldri spældi eg ikki longur. Tá ið eg kom til Danmarkar hoyrdi eg um, at ein kundi spæla koyristólafótbólt. Hetta mátti eg royna og havi spælt síðani 2004, sigur Áki, sum umvegis fótbólti í koyristóli hevur fingið mong góð minni – okkurt skarar tó framúr.
– Vit spældu HM í 2007 í Japan. Tað var ein stór uppliving, sigur Áki, sum av lyndi er lívsjáttandi og ógvuliga smílandi.
Vøllurin í koyristólafótbólti kann í mesta lagi vera 30 m langur og 18 m breiður. Fýra leikarar eru á hvørjum liði. Málmaðurin tekur vanliga lut í álopsspælinum og tað er ikki óvanligt, at hann eisini skjýtur mál. Mest loyvda ferðin hjá leikarunum er 10 km/t.
Silvur í DM
Áki spælir við koyristólafótbóltsliðnum í Aalborg, sum kallast Aalborg Powersoccer. Teir venja hvønn mánadag, og einaferð um mánaðin eru teir til kapping. Fýra tey bestu liðini koma víðari til endaspælið, og higar rukku Áki og liðfelagar hansara úr Aalborg Powersoccer.
Tað eydnaðist Áka og teimum at spæla seg heilt fram til DM-finaluna, hetta umvegis ein 1-0-sigur ímóti Tjørring Dolphins í hálvfinaluni.
Í finaluni møttu teir Aarhus Rolling Devils, sum í nógv ár hevur myndað oddan í koyristólafótbólti í Danmark. Vanliga leiktíðin endaði við málleysum javnleiki, men longda leiktíðin gjørdist endastøðin hjá Áka og teimum. Aarhus Rolling Devils skoraði í evstu løtu og kunnu tískil kalla seg danmarksmeistarar, meðan Áki kann kalla seg silvurvinnara.
– Vinnarin vann sær luttøku í Champions League, so tað var harmiligt, at vit ikki vunnu, sigur Áki um finaluna.
Trívist við fótbóltin
Tað hevur eina góða ávirkan á Áka, at hann spælir koyristólafótbólt. Vit spurdu hann, hvat hann fær burturúr.
– Tað er so nógv. Felagsskapur, spenningurin um hvussu tað fer at ganga og hvussu góð kenslan er at skjóta mál, sigur Áki.
Hann og liðfelagarnir venja einaferð um vikuna – hvørt mánakvøld.
EM í boccia
Kappingarárið í koyristólafótbólti er júst at enda komið, men Áki skuldi ikki bíða leingi eftir síni næstu avbjóðing. Hann hevur síðstu vikuna nevniliga verið í Portugal, har hann hevur luttikið í EM í boccia. Kappingin var í býnum Guimarães, har 135 spælarar frá 23 ymiskum londum kappaðust kappast um evropameistaraheitið. Luttakaratalið var hitt mesta nakrantíð.
Áki reyk út úr bólkaspælinum eftir at hava tapt báðar sínar dystir.
– Tað gekk ikki soleiðis sum eg hevði vónað. Eg eri vónbrotin, tí eg veit, at eg kann gera tað betri, segði Áki um kappingina.
Hann er nú afturkomin til Aalborg, har hann eitt nú fer at fyrireika seg til HM komandi ár. Enn er ikki greitt, hvar kappingin verður, men Suðurkorea hevur nýliga bjóðað seg til at vera vertur.
