Fleiri politikarar vóru til kravgonguna um fría fosturtøku í dag. Millum annað var landsstýrismaðurin í lógarmálum Bjarni K. Petersen til staðar. Í vár legði hann uppskot um fría fosturtøku til 12. viku, men uppskotið varð felt – millum annað tí hansara egnu floksfelagar úr Framsókn, Hanna Jensen og Sólvit E. Nolsøe, atkvøddu ímóti uppskotinum.
Bjarni K. Petersen heldur tað vera positivt við hesari kravgonguni í dag:
– Tað er gott og stuttligt at síggja, at fólk fara út at gera vart við sína støðu og sína ónøgd. Nú havi eg roynt at ómakað mær við at vera til staðar hjá báðum síðum. Eg var eisini til tiltakið “Standa fyri lívi” á Vaglinum í apríl fyri at hoyra tað sjónarmiðið, sigur hann.
– Eg roknaði við, at vit fóru at samtykkja eina lóg, sum er ein endurspegling av hugburðinum millum fólk. Tað bleiv tað so ikki til. Og tað er nokk tí, at tey ganga á gøtunum í dag.
Fer hetta at ávirka nakað fyri teg?
– Nú rokni eg við, at fólkini her vóna, at hetta fer at leggja trýst á politikararnar. Sjálvur haldi eg, at uppskotið, eg legði fram, var eitt gott uppskot, sum var fakliga og moralskt forsvarligt. Men tað veldst um. Tað krevst, at fortreytirnar broytast, og at hugburðurin í tinginum eisini fer at broyast. Kanska hetta kann broyta uppá tað, sigur Bjarni K. Petersen.
LES EISINI: Myndir frá kravgongu um fosturøku: »Vit fara ikki tigandi aftur í 50'ini«
Kann man rokna við, at tú fert at leggja uppskotið fram aftur í heyst?
– Tað veldst um, hvørt eg havi undirtøku fyri tí, sum eg leggi fram.
.jpg)
