Sjálvt um Great Greenland í fjør keypti munandi færri kópaskinn enn áður, so eydnaðist kortini felagnum og framleiðaranum at fáa eitt avlop í rakstrinum í fjør á fýra miljónir krónur.
Great Greenland er ein nútímans garvingar-og framleiðslufyritøka, sum arbeiðir við skinnum og framleiðir klæði, mótaklæði og ymiskar vørur úr skinnum, serliga kópaskinnum.
Fyritøkan hevur sína framleiðslu í Qaqortoq í Suðurgrønlandi.
Tað eru serliga lidnu vørurnar hjá Great Greenland, sum eru orsøkin til góða úrslitið í fjør, og her hevði fyritøkan stóran vøkstur í søluni.
Lidnu vørurnar vóru serliga skinn og vørur úr skinnum, eitt nú taskur, inniskógvar, vøttir og lyklaringar, veit heimasíðan hjá Sermitsiaq at siga.
Vónirnar í fjør vóru, at Great Greenland fór at keypa eini 30.000 skinn, men talið gjørdist einans 23.000.
- Tað var serliga veiðan eftir ringkópi, sum sveik í Eysturgrønlandi og í Upernavik-økinum, sigur stjórin í Great Greenland, Preben Møller, sum síðsta mikudag legði fram ársfrágreiðing fyri felagið.
Hann segði, at felagið í 2020 tjenti eina miljón meira upp á lidnar vørur enn væntað.
- Tað vóru serliga viðskiftafólk í Danmark og Grønlandi, sum bíløgdu vørurnar, men eisini viðsiftafólk í eitt nú USA, Kanada og fleiri øðrum evropeiskum londum.
Stjórin segði í sínari ársfrágreiðing, at Great Greenland hevur gjørt nógv við at kunna um mongu ymisku vørurnar, sum fyritøkan hevur, og segði, at sølan á netinum er nógv vaksin.
