Meinhard E. Olsen var á vøllinum ein tíma, og Martin Agnarsson spældi allan dystin, tá føroyingauppgerð var á skránni í næstbestu donsku fótbóltsdeildini.
Á Autocentralen Park leikvøllinum í Kolding endaði dysturin millum heimaliðið, Kolding og Aarhus Fremad við javnleiki 1-1.
Pontus Texel legði Kolding á odda í 18. minutti. Átta minuttir seinni brendi Mathias Kubel hjá Aarhus Fremad eitt brotsspark. Kolding var á sigurskós líka til 89 minuttir vóru leiktir. Tá megnaði Martin at gagnnýta, at málverjin hjá Kolding, Lennart Moser ikki helt einum innleggi, og Martin beindi bóltin í netið til 1-1.
Talan var um fjórða málið hjá Martin hetta kappingarárið. Martin hevur eisini lagt upp til trý mál í hesum kappingarárinum.
Nú verður vetrarsteðgur í deildini fram til 1. mars.
Kolding er á sjeynda plássinum við 26 stigum, og Aarhus Fremad er á níggjunda plássinum við 20 stigum.
