Nógv orðaskifti tók seg upp, tá bretskir fiskakeyparar søgdu seg ikki vilja keypa føroyska hýsu, men Jacob Vestergaard heldur ikki, at MCS og ICES hava neyðuga innlitið. Støðan á bretska marknaðinum kom í, tí havumhvørvisfelagsskapurin Marine Concervation Society (MCS), setti føroyska hýsu á lista yvir fiskasløg, sum tey ráða fólki frá at keypa.
Orsøkin til, at MCS hevur føroyska hýsu á svartalista, er, at altjóða havgranskingarstovnurin ICES heldur, at føroysk hýsuveiða skuldi verið steðgað longu í 2009.
Landsstýrismaðurin í fiskivinnumálum, Jacob Vestergaard, sigur, at boðskapurin hjá MCS - og óbeinleiðis frá ICES ? hevur ført til bráðfeingis handilsbann móti føroyskari hýsu.
Hann vísir til eitt brot úr ICES-frágreiðing um hýsustovnin við Føroyar fyri 2009, har havgranskingarstovnurin sigur, at stovnurin nú verður veiddur burðardygt.
- At ICES so í niðurstøðuni kortini mælir til at gevast við allari hýsuveiðu og samstundis mælir til at leggja eina ætlan um at byggja stovnin uppaftur, vísir, at tey ikki hava neyðuga innlitið í okkara fiskiskap.
Landsstýrismaðurin vísir á, at sera lítil beinleiðis hýsufiskiskapur er við Føroyar, men at tað mesta verður veitt sum hjáveiða í øðrum fiskiskapi.
Jacob Vestergaard samanber eisini orðingarnar hjá ICES við orðingarnar hjá MCS um okkara hýsuveiðu.
- Her síggja vit, hvussu lítið hesin umhvørvisfelagsskapur vandar sær um sín boðskap, tí MCS sigur beinleiðis, at hýsa í føroyskum sjógvi er fyri ovfiskiskapi, og vísir til ICES, sum í síni frágreiðing sigur, at hýsa nú verður veidd burðardygt, sigur Jacob Vestergaard, sum heldur, at vit sjálvandi skulu taka trupulleikarnar í størsta álvara.
