Tað kavaði, og kuldin var umleið minus 20 stig, tá havnarmaðurin Jákup Alberg Berg náddi tindinum á Kilimanjaro sunnudagin kl. 06.45.
Kilimanjaro í Tanzania er eitt av heimsins hægstu fjøllum og er við sínum 5.895 metrum hægsta fjall í Afrika.
Tey vóru fýra, Jákup Alberg og tríggir danir, sum høvdu sett sær fyri, at klára túrin uppá Kilimanjaro uppá 6 dagar. Túrurin byrjaði mikudagin 26. januar, og tey byrjaðu frá 1.700 metrum.
Um miðnáttarleitið leygarkvøldið byrjaði túrurin upp á sjálvan tindin, teir seinastu knøppu 1200 metrarnir.
Av teimum fýra var tað bert Jákup Alberg, sum gjøgnumførdi túrin upp á tindin.
Jákup Alberg sigur í telduposti, at túrurin var og ótrúliga krevjandi og nógv torførari, enn hann hevði roknað við.
