Kostnaðarstøði
Tað eru kanska ikki øll sum trúgva tí, men hesa seinastu tíðina er tað blivið eitt sindur bíligari at búgva í Føroyum.
Tað vísa tey turru tølini hjá Hagstovu Føroya.
1. apríl í fjør fingu vit nýtt prístal, men síðani eru ikki tær stóru broytingarnar hendar í prísunum.
4. ársfjórðing 2001 fór prístalið 0,7 prosent niður, soleiðis at tað 1. januar 2002 er 99,3.
Eins og ársfjórðingin frammanundan er tað munandi rentulækking á sethúsalánum og lægri brenniolju- og bensinprísir, ið togað prístalið niðureftir.
Talvan niðanfyri vísir, hvussu gongdin hevur verið í 12 høvuðsbólkum síðan 1. apríl, tá nýggja prístalið varð roknað fyrstu ferð.
Mat- og drekkavøruprísirnir eru lækkaðir 0,3 prosent. Tað eru serliga lægri grønmetisprísir, ið hava ávirkað prístalið niðureftir fyri henda bólk.
Prísirnir á klædnavørum og fótbúnaði eru farnir 0,3 prosent upp. Sama er galdandi fyri bólkin innbúgv og húsbúnað.
Prístalið fyri býli er farið góð 6 prosent niður. Hesin bólkur er samansettur av húsaleigu, rentuútreiðslu á sethúsalánum, viðlíkahaldi á bústað, ravmagn og hita. Tað er rentulækkingin, sum hevur havt størstu ávirkanina í hesum bólki.
Húsaleigan, sum verður gjørd upp eftir gongdini í sethúsaprísunum, er harafturímóti farin 4 prosent upp. Útreiðslurnar til viðlíkahald eru vaksnar gott prosent. Meðan prísurin á brenniolju til húsarhald er farin 5,6 prosent niður.
Prísurin á bensini er lækkaður góð 3 prosent. At prístalið fyri henda bólk samanlagt kortini er farið nakað upp kemst serliga av, at prísirnir á bilum og verkstaðartænastum eru uppfarnir.
Eisini gjøld fyri aðrar tænastur, so sum postgjøld, frítíðarferð uttanlands í bólki 9 og barnaansing og hárfríðkan í bólki 12 eru farin upp.
Nú er aftur bíligari at liva í Føroyum
