Byggingin av nýggja barnagarðinum í Trongisvági gongur væl, skrivar Tvøroyrar kommuna í dag. Stálkonstruktiónirnar verða nú settar upp og arbeiðið við límtræi verður eisini gjørt.
Tað er MTV-Byggivirki, ið stendur fyri hesum arbeiðnum og sambært leiðaranum í Teknisku Deild hjá Tvøroyrar Kommunu, verður bygningurin liðugt reistur umleið mars í ár. Herfyri varð sáttmáli undirskrivaður við Bærendsen Teknik í Trongisvági og fevnir hesin sáttmáli um el-, automatikk- og HVS-arbeiði.
Verandi barnagarðurin varð tikin í nýtslu 21. mai 1990, og tá var verandi borgarstjórin við at taka avgerðina um bygging av barnagarði. Avgerðin um víðkanina varð tikin av sitandi býráði í 2017.
Í dag er ganga 52 børn í Mýrifípuni, og tá útbyggingin er liðug verður rúm fyri 52 børnum aftrat. Útibarnagarðurin verður eisini í barnagarðinum og fer at hava rúm fyri 20-35 børnum. Hann verður í tveimum hæddum.
Sambært Tvøroyrar kommunu er stórur áhugi fyri at sleppa í barnagarð. 26 børn eru á bíðilistanum til vøggustovu og 12 børn eru á bíðilistanum til barnagarð.
Kelda: Tvøroyrar kommuna
