Hvíti minnilutin kúgaði svarta meirilutan. Ofta við harðari hond. Massakran í Sharpwille er bara eitt dømi um, hvussu tey svørtu vóru skotin niður. Stórur partur av heiminum fordømdi stjórnina í Suðurafrika, men tað vóru lond og pollitikarar, sum tagdu. Kortini vóru tað politikarar og bløð, sum ikki tagdu. Tvørturímóti fekk stjórnin og »táverandi Suðurafrika« stuðul og herðaklapp frá okkara heimliga Dagblað, málgagni Fólkafloksins. Dagblaðið og blaðstjóri tess bart út ávaraðu ímóti blóðbaði tann dag, svarti meirilutin fekk valdið. Fólkaflokkurin mótmælti ikki.
Hetjur, sum stríddust ímóti apartheidskipanini ogh fyri fólkaræði, vórðu hunddálkað og hildin fyri gjørldur. Hvør minni ikki speirekandi orðini um Desmond Tutu, biskupp, tá hann ferðaðist í Norðurlondum fyri at fáa stuðul til stríðið ímóti rasuskilnaðinum. Og føroyingar, sum skipaðu fyri stuðulstiltøkunum, fingu somu viðferð. Men hetta stríð bar við sær, at Mandela varð latin leysur, eftir at hava sitið í fongsli í 27 ár. Fólkaítakið kring alt Evropa gjørdi, at apartheidskipanin at enda mátti dvína - men einki blóðbað hevur sermerkt Suðurafrika, síðani svarti meirilutin fekk vanlig mannarættindi, og fólkaræaði varð skipað!!!
Nú leggur Nelson Mandela frá sær, og í hesum døgum er hann á takkarferð í Norðurlondum. Vit kunnu ikki annað enn fegnast um, at Føroya løgmaður sleppur at vera við til almenna hátíðarhaldið í Danmark. Men tað kann ikki skírast annað enn lagnunnar speisemi, at tað er oddamaður Fólkafloksins, sum verður við í heiðursgildinum fyri Nelson Mandela. Sosialurin ynskir Nelson Mandela hjartaliga vælkomnan til Norðurlond, sum vóru heitastu stuðlar hjá ANC og Mandela øll tey árini, hesi stríddust harðast ímóti hvíta aparteidstýrinum.
