Í gjár, tá løgreglan var úti við ferðmátaranum, vórðu nakrir bilførarar skrivaðir fyri at koyra ov skjótt.
Løgreglan gav bøtur og klipp, og ein bilførari fekk treytaða frádøming av koyrikortinum.
Í bygdum øki í Kollafirði vórðu trý mál skrivað, har bilarnir vórðu máldir at koyra ávikavist 72, 78 og 81 kilometrar um tíman.
- Tveir fingu klipp og tann, sum koyrdi við mestu ferðini, fekk treytaða frádøming. Haraftrat fáa allir hvør sína bót.
Løgreglan kannaði eisini ferðsluna í bygdum øki í Søldarfirði, har ein bilførari varð máldur at koyra 71 kilometrar um tíman.
- Hetta gevur klipp í koyrikortið í bygdum øki, umframt bót, sigur vaktleiðarin.
Nøkur smærri ferðsluóhapp hava eisini verið seinasta samdøgrið, men hetta eru mál, sum bilførarar - um teir kunnu finna út av tí saman - kunnu loysa sínámillum.
- Hava bilførarar brúk fyri okkara vegleiðing í slíkum føri, har eingi álvarslig brot eru á ferðslulógina, eru vit sjálvsagt til reiðar, sigur vaktleiðarin.
Løgreglan sigur, at náttin annars hevur verið rímiliga friðarlig.
- Onkur hevur spælt heldur harðan tónleik, onkur sjúkraflutningur hevur verið, og vit hava verið til steðar í býnum í Havn, so fólk ikki fóru til hendurs.
Í Vágum varð eisini ein bilførari tikin tíðliga í nátt, sum var ávirkaður av øðrum enn vanligum rúsdrekka, visti vaktleiðarin at siga í morgun.
