- Hetta lógaruppskotið verður ein vanlukka fyri alt okkara vakra Føroyaland og fólk. Føroyingar verða lagdir á blik fyri øllum heiminum – fyri nakrar fáar krónur.
Tað sigur formaðurin í Føroya Óðalsfelag, Niels Pedersen, nú traktorar og landbúnaðarakfør eru á veg á Vaglið í Havn at mótmæla.
Niels Pedersen sigur, at við lógaruppskotinum hjá landsstýrinum um sokallaða burðardygga ferðavinnu verða føroyingar gjørdir til gestir í egnum landi.
- Hví, sigur eg nú so?
Og formaðurin í Føroya Óðalsfelag heldur fram:
- Jú, tí nú sleppur allur heimurin av vála og slóma ella fara upp á land, har tey vilja, og nær tey vilja – fyri bert nakrar fáar krónur.
Niels Pedersen vísir á, at eitt nú sleppa íslendingar framat ferðavinnuni í Føroyum sum teimum lystir sambært Hoyvíkssáttmálanum – og uttan forðingar.
- Aldargamlir siðir og reguleringar innan landbúnaðin verða skúgvaðir til viks. Rakstur av hagunum og seyðarakstur verður burtur.
Formaðurin í Føroya Óðalsfelag vísir á, at hagastýrir, hagastevnur og grannastevnur, sum er ein tann mest demokratiska skipan, vit hava, verður undirgrivin.
- Landbúnaðarstevnur og yvirlandbúnaðarstevnur, sum eru tryggjaðar við dómsvalinum – ja, sorinskrivaranum – verða gjørdar til einkis, sigur Niels Pedersen.
Tað eru Bóndafelag Føroya og Føroya Óðalsfelag, sum skipa fyri tiltakinum í dag, og sum skilst verða landbúnaðarakførini á Vaglinum í Havn um eina lítla løtu.
##med2##
##med3##
##med4##
