Nú fara umførini í bestu fótbóltsdeildini av álvara at fækka. Í dag eru fýra dystir í 22. umfari á skrá. Í gjár var ein dystur. Tað endaði 1-1 á Svangaskarði, har EB/Streymur var gestur hjá B68. Báðir partar kendu seg at missa – EB/Streymur í kappingini um fjórða plássið og B68 í kappingini fyri at sleppa undan niðurflyting.
EB/Streymur kappast við B36 um fjórða plássið. Í dag fer B36 at spæla grannauppgerð á Argjum.
B68 kappast við NSÍ. Í kvøld fer NSÍ at spæla grannauppgerð á Skála.
Í Sarpugerði verður suverena toppliðið KÍ gestur hjá Víkingi, ið er einasta liðið, sum hevur møguleika at fáa fatur á toppliðnum.
Líkindini at spæla fótbólt vera á góðari leið í dag. Hitastigini vera 10 – 12, og vindferðin verður umleið 6 metrar um sekundið av landssynningi. Tað er møguleiki fyri, at tað seinnapartin fer at regna.
22. umfar
Sunnudagin 11. september
Víkingur – KÍ: Jóhan Hendrik Ellefsen kl. 15.00
Skála – NSÍ: Eiler Rasmussen kl. 18.00
07 Vestur – HB: Rani A. Skaalum kl. 15.00
AB – B36: Bjarki Danielsen kl. 15.00
-
Leygardagin 10. september
B68 – EB/Streymur 1-1 (1-0)
1-0: Boubacar Dabo 25.
1-1: Bogi Reinert Petersen 48.
Dómari: Petur Reinert
B68: Benjamin Schubert – Gilli Samuelsen, Aidan Liu, Hjalti Strømsten, Bárður Ó. Olsen - Aleksandur Ó. Jensen, Sebastian Lau Nielsen (Áki Johannesen, 71.) – Mohamed Samba, Hugin Samuelsen (Andri Benjaminsen, 85.), Steffan A. Løkin (Esmar P. Clementsen, 60.) – Boubacar Sidik Dabo
Gult kort: Hugin Samuelsen, Sebastian Lau Nielsen, Hjalti Strømsten
Venjari: Jákup á Borg
EB/Streymur: Kristian Joensen – Elias El Moustage, Mikkjal Hellisá, Andras Ó. Olsen, Mattias Weihe Joensen – Bogi Reinert Petersen, Rógvi Egilstoft – Jacob Andersen, Philip Djordjevic, Jóhann Hansson Joensen – Gutti Dahl-Olsen
Gult kort: Mattias Joensen, Andras Ó. Olsen
Venjari: Jákup Martin Joensen
