Hetta er ein ógvuliga áhugaverdur spurningur, javnaðarleiðarin reisir. Í øðrum londum merkir blokkpolitikkur, at tú frammanundan valinum veitst, hvørja stjórn tú fært, um tú velur hendan ella handan flokkin. Í Danmark vita fólk nú - sambært veljarakanningum altso - at tey fáa eina javnaðarstjórn, og at Helle Thorning Schmidt verður forsætisráðharri. Men eitt ár er eftir til valið, so tað kann venda aftur, og so vita fólk, at Lars Løkke Rasmussen verður forsætisráðharri, um stjórnin verður borgarlig.
Í Føroyum hava vit onga hóming um slík viðurskifti, fyrr enn eftir eitt mangan drúgvt samráðingarumfar á Gamla Apoteki eftir valið. Og tað kann enda við teimum løgnastu samansetingunum. Allir flokkar hava samstarvað so ella so. Taka vit landsins stýri í dag, so er tað sett saman av einum borgarligum konservativum loysingarflokkin, einum borgarligum liberalum sambandsflokki og einum vinstravendum Javnaðarflokki, sum vil varðveita ríkisfelagsskapin við Danmark.
Meðan Tjóðveldisflokkurin og Javnaðarflokkurin hava samstarvað væl politiskt, so klára teir illa upp saman. Politiska svarið upp á tað er helst, at Tjóðveldisflokkurin er meira loysingarflokkur enn ein politiskur flokkur á vinstraveinginum.
Ein stórur partur av føroyingum halda, at vit skulu fáa greiði á ríkisrættarligu støðuni, áðrenn vit fara at arbeiða við vanligum politikki – har vit gera av, hvussu samfelagságóðarnir skulu býtast. Soleiðis hava vit stríðst í góð hundrað ár, og enn hava fólk sum heild ikki fatað tað, at føroyingar flestir vilja varðveita ríkisfelagsskapin við Danmark. Hóast summi halda fast um eina fløkta 64 ára gamla fólkaatkvøðu, so hava øll løgtingsval síðani – og allar landsstýrissamgongur víst, at vit vilja varðveita ríkisfelagsskapin.
Jú, tað hevði heilt víst verið áhugavert við blokkpolitikki í Føroyum. Sjúrður Skaale, tingmaður, hevur víst á tað sama herfyri.
Kritiski spurningurin til Jóannes Eidesgaard eigur tí at verða, hvørjar flokkar hann fer at peikað sær í sín blokk. Valla teljast samgongufelagarnir í Tinganesi teirra millum. Vit kundu skotið upp á Tjóðveldi og Miðflokkin – og so kanska Sjálvstýri, sum eisini kann fella í borgarligu leguna. Men blokkpolitikkur krevur, at vit hava veruligar flokkar, sum duga at arbeiða politiskt, og sum duga at planleggja. Tað krevur nakað av flokkunum, men hevði gagnað fólkaræðinum.
