Tað er vert at merkja sær, at Fólkaflokkurin framvegis leggur rygg til størstu afturgongdina hjá samgonguflokkunum, hóast hinir flokkarnir í samgonguni ferð eftir ferð fáa skotið í skógvarnar, at samgongan førir fólkaflokspolitikk.
Flokkurin hjá løgmanni missir gott nokk 1,2 prosent av atkvøðunum, men tað nervar ikki umboðanina á tingi, tí flokkurin fær framvegis átta fólk á ting. Her er vert at merkja sær, at løgmaður av fleiri verður skírdur at vera vorðin í so høgravendur, síðani hann fór í hóslag við Fólkaflokkin og Jørgen Niclasen. Fyrrverandi formaður Sambandsfloksins, Edmund Joensen hevur fleiri ferðir víst á hetta, seinast í tíðargrein í Sosialinum seinasta fríggjadag, har hann bæði vísti á høgrasnaring hansara og áhuga løgmans fyri fullveldinum.
Men tølini tala løgmanni til fyrimunar. Hann missir ikki ta undirtøku, ið slíkur innanhýsis kritikkur átti at elvt til, og kunnu vit soleiðis staðfesta, at veljararnir hjá Sambandsflokkinum ikki í stóran mun taka undir við sosial-liberala veinginum hjá Edmundi Joensen, men heldur høgra-radikalu linjuni hjá Kaj Leo Johannesen.
At Sjálvstýrisflokkurin rýkur út er kanska ikki so løgið. Flokkurin hevur ikki fótað sær eftir vánaliga úrslitið á valinum seinast – og tað hevur eftir øllum at døma ikki hjálpt, at flokkurin kom upp í samgonguna og fekk politiska ávirkan.
Miðflokkurin er tann, sum í prosentum fær minstu afturgongdina: Hann gongur eitt hálvt prosent aftur – men varðveitir báðar tingsessirnar. Umframt ávaringarnar frá Edmundi Joensen, so er Jenis av Rana tann í samgonguni, sum hevur talað harðast at samgonguni. Hann hevur beinleiðis hótt við at fara úr samgonguni, um samgongan ikki broytti kós. Tað hevur samgongan ikki gjørt, og Jenis er framvegis partur av samgonguni. Ávaringar hansara verða neyvan tiknar í álvara longur, tí tú hóttir ikki fleiri ferðir, uttan at tað fær avleiðingar.
Men sambært veljarakanningini, so er tað júst Jenis av Rana, sum stendur við lyklinum til næstu samgonguna. Ein samgonga millum Javnaðarflokkin og Sambandsflokkin er valla møgulig við Kaj Leo Johannesen sum løgmanni. Alternativa samgongan er tí millum andstøðuflokkarnar. Men teimum tørvar eina atkvøðu, hana hjá Jenisi av Rana, sum nú er trygdin fyri borgarligu samgonguni, sum enn hevur størra álitið millum veljararnar.
