Løgtingið fór í gjár undir viðgerðina av hesum góða uppskoti, sum hevur verið ávegis seinastu 12 árini.
Tað boðaði frá góðum, tá umboð úr øllum flokkum løgdu fram álitið um stjórnarskipanaruppskotið. Men tað vísti seg skjótt, at full semja ikki var í øllum flokkum, og tað gav at bíta, tá løgmaður á ríkisfundi í Skagen boðaði frá, at uppskotið var burturdottið, og at tað fór ikki at verða lagt framaftur.
Løgtingsumsitingin og løgfrøðingar hava víst á, at løgtingið ikki eigur at viðgera uppskotið, tí tað er í stríð bæði við grundlóg, heimastýrislóg og stýrisskipanarlóg.
Hóast tingfólk eru viknað í kongunum, so er kortini at vóna, at tey finna eina skilagóða semju í hesum máli. Tað ber ikki til, at vit fella aftur í gomlu grøvina hjá Tjóðveldi og Sambandi, har als eingin dialogur er.
Tað er ov býtt, um komandi ættarlið skulu verða vitni til eins tápuligt kjak, sum vit seinastu mansaldrarnar hava havt um eina ósera greiða og fløkta fólkaatkvøðu í 1946.
Eitt er vist. Føroyingar vilja ikki hava loysing, og føroyingar vilja heldur ikki aftur í amtstíðina. Tí er loysnin harímillum. Tað er utopiskt at ímynda sær, at Føroyar koma aftur í eina amtslíknandi støðu ella verða ein fult integreraður partur av Danmark. Tá fullveldi samstundis er so fjart, so er tað bara skyldan hjá okkara fólkavaldu at gera eina skipan, sum er harímillum. Her er stjórnarskipanaruppskotið ein gyltur møguleiki.
Men Hans Pauli Strøm hevur grein í sínum máli, at um ikki allir flokkar samtykkja nýggju skipanina, so kann tað gera tað sama.
Í so máta hava vit ikki góðar royndir av føroyskum politikarum. Kjakið um ríkisrættarligu støðuna hevur ikki verið sakligt seinastu øldina - kanska heldur beinleiðis fordummandi. Síðstu árini eru tó munandi framstig hend, har bæði Sambandsflokkurin og Tjóðveldisflokkurin hava flutt seg.
Tað er tað, sum er politikkur - at flyta seg.
Tað ber til at gera eina stjórnarskipan, sum hóskar øllum flokkum. Ein stjórnarskipan skal ikki verða ein avgerð um fullveldi - ella um at binda føroysku tjóðina í danska ríkinum.
Tað er avbjóðingin hjá løgtinginum at finna hesa tjóðarsemjuna, sum verður grundarlagið undir førohyska fólkaræðinum.
