Hóast løgmaður fór til val uppá, at eingin skuldi hava skattalætta, sum hann kunngjørdi kvøldið fyri valið, so er flatskatturin legitimiteturin hjá samgonguni – tað sum heldur fyrst og fremst Fólkaflokkinum og Sambandsflokkinum saman.
Tí er tað so sera umráðandi hjá samgonguni at fáa samtykt skattalógarbroytingina um flatskattin sum skjótast, tí fellur hann til jarðar, so er framtíðin hjá samgonguni óviss.
Men tað sum hevur eyðkent løgmann og Sambandsflokkin í seinasta valskeiði – tað vísir seg eisini at verða galdandi nú: Sambandsflokkurin veksur, meðan Fólkaflokkurin má leggja rygg til meginpartin av tapinum hjá samgonguni, tó at teir smáu flokkarnir eisini bera sítt tap.
Ongantíð hevur ein so nýggj samgonga fingið so nógvan ágang, sum hendan samgongan hevur fingið. Tí var ein afturgongd ikki annað enn væntandi. At tapið kortini ikki varð størri enn fimm prosent – og at samgongan varðveitir meirilutan, vísir, at fólkið í ein ávísan mun tekur undir við landsstýrinum, tekur undir við flatskattinum og tekur undir við, at blokkstuðulin úr Danmark skal hækka.
Tað merkir eisini, at fakfeløgini ikki hava fingið nóg stórt ljóð fyri mótmælunum. Tó tú skuldi hildið, at eitt so stórt trýst sást aftur, soleiðis at samgongan í kanningini misti meirilutan. Men tað er ikki hent.
Sambært orðaskiftinum í gjár, so stendur samgongan saman um flatskattin. Andstøðan og fakfeløgini mugu síggja í eyguni, at hetta slagið er tapt, her vendst valla aftur.
At tað er Fólkaflokkurin sum missir í veljarakanningini, og at Javnaðarflokkurin veksur og verður næst størsti flokkur, er kanska nátúrligt – um vit hugsa um júst stríðið um flatskattin. Formansstríðið í Fólkaflokkinum hevur helst eisini kostað, eins og kúvendingin frá fullveldis- til blokkstuðulsflokk.
Tað sum undrar er tó, at kúvendingin hjá øllum teimum trimum fyrrverandi fullveldisflokkunum ikki sæst aftur í framgongd hjá Tjóðveldinum.
Kanska hetta er ber boð um, at veljarin heldur vil velja millum hugsjónir enn tjóðskaparstríð. Kanska vit áttu at fingið blokkpolitikk í Føroyum, so veljarin visti, hvørja stjórn hann fekk.
Fakfeløgini mugu eisini leggja á annan bógv, um tey vilja hava politiska ávirkan og ikki koma sum ketta úr høvdatrog aftan á valið, sum tey gjørdu hesaferð.
