Tilgongdin við at broyta serliga gullrandaðu pensjónina hjá politikarum byrjaði í næstsíðstu tingsetu. Kaj Leo Holm Johannesen var tann løgmaðurin, sum umsíðir fekk tikið seg saman at koma í tingið við uppskoti um at broyta pensjónina hjá landsstýrisfólki – og tey viðurskiftini vórðu broytt, tá landsstýrið hjá Aksel V. Johannesen tók við.
Grammleikin hevur verið øgiligur hjá politikarum, sum hava tiltuskað feita almenna tænastumannapensjón. Tað so ógvusligt, at landsstýrisfólk kundu upptjena sær fulla tænastumannapensjón upp á 8 ár. Tað vil siga, at tey eftir 8 árum í landsstýrinum kundu fáa góðar 33.000 krónur í pensjón restina av lívinum, enntá longu tá tey eru 60 ár. Løgmaður og løgtingsformaður fáa slakar 40.000 kr í pensjón, somuleiðis kunnu teir fáa tað frá 60 ára aldri.
Hjá tingfólki er pensjón lægri, men eisini 60 prosent av lønini og tí góðar 24.000 krónur um mánaðin. Tingfólk skulu hava sitið 16 ár á tingi fyri at fáa fulla pensjón. Páll á Reynatúgvu lovaði at broyta hesi viðurskifti, tá hann var formaður. Man hann pjakaði sær av onkrari orsøk so illa við uppskotinum, at tað kom so seint í tingið – og so sendi hann sjálvur tingið til hús, áðrenn hansara egna uppskot varð viðgjørt. Tí fall tað burtur.
Tað hevur leingi verið soleiðis, at politikarar pjakar sær sum mest, tá tað snýr seg um at taka av hesi vitleysu serrættindi, sum teir hava givið sær sjálvum.
Tað er í fínasta ordan, at politikarar fáa góða løn. Men tað er ikki í ordan, at teir hava tiltuskað sær marglætispensjónir, sum onnur fólk høvdu skulu goldið langt yvir 100.000 kr um mánaðin fyri at fingið frá til dømis Lív. Tað sigur seg sjálvt, at hetta skal avtakast alt fyri eitt. Og málið er sera einfalt. Politikarar skulu hava somu treytir sum allir aðrir løntakarar í Føroyum. Pensjón skal avspeglast í lønini. Landsstýrisfólkini fáa nú 15 prosent í pensjónsinngjaldi oman á lønina. Tað kunnu tingfólk eisini fáa. Tað er eingin orsøk til at hækka lønina fyri tað. Pensjónin er hamrandi órímulig, og tí skal hon bara avtakast!
