Og tað var týðuligt, at fakfeløgini hesaferð ætla at gera bart. Georg Hansen, formaður í Føroya Arbeiðarafelag, sigur, at hetta bara er fyrireiking til tað, sum koma skal.
– Vit fara ikki at sita á reyvini, meðan tey oyðileggja okkara pensjónsskipan, segði hann hóttandi.
Hóast fáur hevði trú tí, so hevur tað hepnast Fólkaflokkinum at smoyggja flatskattaskipanina inn í samgonguskjalið, og tað hevur eisini hepnast flokkinum at frelsa sjálvt Jenis av Rana, sum nú gongur beint ímóti sínum vallyftum við at verja tey á teimum ovastu rókunum, hóast hann í áravís hevur átikið sær leiklutin sum verji hjá teimum, á teimum niðastu rókunum. Eisini hevur hann nú í sjey ár speirikið serliga Javnaðarflokkin, men eisini Fólkaflokkin og Sambandsflokkin fyri at geva teimum ríku skattalætta. Soleiðis broytast fólk fyri at fáa makt. Jenis av Rana vil heldur hava maktina enn at veita teimum lágløntu skattalætta. Og hann blúgvast eftir øllum at døma ikki við at selja seg fyri skattalætta til millióningar.
Tað skerts ikki brut, at tað júst er Miðflokkurin, sum er skurkurin í hesum máli. Fólkaflokkurin hevur tónað reint flagg. Hann er ein borgarligur flokkur, sum stendur fyri slíkum politikki. Gamla Sjálvstýri hevur leiklutin sum politiski veðurhanin, sum snýr seg í ta ætt, sum nú einaferð hóskar best. Løgmaður segði kvøldið fyri valið – sum tann einasti floksformaðurin – at vit skulu ikki hava skattalætta.
Men í politikki ber alt til – og at broyta eina meining 180 stig upp á tveir dagar, tað ber væl til, tí tað hava allir flokkarnir í samgonguni gjørt. Sambandsflokkurin við skattalætta, Fólkaflokkurin við at blíva ein blokk-biddaraflokkur og Miðflokkurin við at tryggja millióningum skattalætta, sum serliga limirnir hjá Georg Hansen skulu gjalda.
Kanska ein slíkur hvøkkkur frá borgarligari síðu, sum hendan reaktionera samgongan stendur fyri, fær fakfeløgini at standa saman. Tað kundi verið áhugavert.
Men ein stórfundur og ein mótmælisgonga verða valla tað, sum fær sterka mannin í Fólkaflokkinum niður trappurnar í Albert Hall á Argjum, ella sum fær Jenis av Rana at hyggja tey á niðastu rókum í eyguni.
Uttan atkvøðuna frá fakfelagslimum, so høvdu vit ikki hesa reaktioneru samgongu. Men nú fáa vit at síggja, um fakfelagsrørslan megnar at standa saman, og um hon dugir at fáa ávirkan á politikkin – ella um hon bara fer upp á barrikadurnar.
