Jan Christiansen eigur taka tað heilt róligt - og ikki loypa fram av í málinum um hotellbygging í Havn.
Hetta sigur Tórfinn Smith, býráðslimur, sum eisini er limur í byggi- og býarskipanarnevndini hjá Tórshavnar Býráð, í samband við tað, sum formaðurin í nevndini, Jan Christiansen segði við Sosialin í gjár.
Eitt er tað, at hann leggur okkum politikarar undir at leka tíðindi - at slatra. Tað kunnu vit liva við. Men tað sum mær dámar verri, er misteinkiliggeringin av umsitingini og øllum starvsfólkunum á býráðnum, sum hann soleiði í bólki, og uttan at nevna nøvn, leggur undir at leka upplýsingar til fjølmiðlarnar, tað haldi eg vera eitt álvarsmál, sigur Tórfinn Smith.
Jan Christiansen hevur als einki at hava sínar skuldsetingar og illgitingar í, sigur Tórfinn Smith
Annars sigur Tórfinn Smith, at júst hetta málið hevur so ofta verið viðgjørt í býráðnum og í so nógvum nevndum. Tí heldur hann einki løgið vera í, at málið nú er komið alment fram.
Fyri alt tað, so havi eg sjálvur langt síðani hoyrt hatta sum slatur í býnum, sigur hann.
Tórfinn Smith heldur tí, at Jan Christiansen skal slappa av, taka tað róligt, og ikki fara soleiðis við hálvum vindi við ógrundaðum skuldsetingum móti sakleysum starvsfólkum á býráðnum.
