Hamas-leiðarin, Ismail Haniyeh, varð fyrr í dag endurgivin fyri at siga, at palestinar vilja ikki rýma úr Gaza.
- Tey vilja ikki rýma úr Gaza til Egyptaland, sigur leiðarin sambært Reuters, og tað er hann, sum er á myndini omanfyri.
Seinni í dag frættist úr Gaza, at 35.000 fólk hava leitað sær skjól við Shifa-sjúkrahúsið í Gazabýi.
Tað sigur leiðslan á sjúkrahúsinum, sum er hitt størsta í Gaza-geiranum.
Orsøkin til, at fólk hava søkt sær skjól her, er óttin fyri, at Ísrael fer at gera innrás í Gaza.
Hildið verður, at talan er um eini 35.000 fólk, sum hava leitað sær til sjúkrahúsið.
Forstjórin á sjúkrahúsinum, Mohammad Abu Selim, váttar yvirfyri tíðindastovuni AP, at stórar mannamúgvur eru savnaðar við sjúkrahúsið.
- Fólk eru inni í sjúkrahúsbygninginum og kring um á økinum við sjúkrahúsið, sigur Mohammad Abu Selim, í kvøld.
