112
Rógvi Nybo
Tað tykist vera torført at fáa boðskapin til bilførarar í Føroyum, at rúsdrekka og koyring ikki hoyra saman.
Veðrið hevur verið av tí fagrasta, og bátastevnan í Vestmanna savnaði sera nógv fólk leygarkvøldið og sunnunáttina.
Hetta merkti løgreglan eisini aftur í teirra arbeiði, tá fleiri fólk hava trupult við at lata bilin standa, hóast tey eru ávirkaði av rúsdrekka.
Um klokkan 2 sunnunáttina varð ein bilur steðgaður í Kaldbaksbotni, og vísti tað seg sum at førarin var ávirkaður av rúsdrekka.
Tá sunnumorgunin nærkast, og dansurin á bátastevnuni er av, steðgar løgreglan einum bili omanfyri Kvívík. Hesin førarin hevði verið á bátastevnu, og ætlaði sær at koyra til hús, hóast hann ikki var nóg edrúur til at føra bil.
Tvørtur um lóg og veg
Ein bilførari helt sunnumorgunin um klokkan 8 seg heilt víst hava fatur í tí rætta, tá hann settist aftanfyri róðrið.
Hvørt tað var rúsdrekka ella okkurt annað, ið hevði ávirkað evnini at skyna munin á røttum og rangum, er ilt at gita, men tá til stykkis kom, var førarin farin tvørur av bæði lógini og vegnum í einum bili, hann einki átti í sjálvur.
Hann hevði nevniliga stolið bilin, og var farin útav Ovara vegi í Vestmanna.
Klokkan 9 sunnumorgunin royndi ein ikki heilt edrúur bilførari helst at sníkja seg til Havnar eftir Oyggj. Á Oyggjarvegnum rendi hann seg tó í lógina, og varð tikin av løgregluni, ið helt eyga við bilum á Oyggjarvegnum.
