Rógvi Baldvinsson og liðfelagarnir í Bryne vunnu í kvøld ein sera týðandi 2-1 útisigur á Skeid í næstbestu norsku fótbóltsdeildini í kvøld.
Skeid kom á tá bert 10 minuttir vóru farnir av fyrra hálvleiki, men beint undan steðginum eydnaðist tað Arne Gunnes at javna til 1-1. Sigursmálið hjá Bryne skoraði svenski Daniel Hermansson, tá 82 minuttir vóru leiktir.
Bryne er fjórðaftast í deildini við 13 stigum, men nú hava teir sjey stig niður til niðurflytingarstrikuna.
Meinhard E. Olsen og liðfelagarnir í Mjøndalen fingu loksins stig aftur, tá teir á heimavølli leiktu javnleik 1-1 móti Åsane. Undan dystinum í kvøld hevði Mjøndalen tapt fimm dystir á rað.
Brinder Singh legði Mjøndalen á odda í fyrra hálvleiki. Åsane javnaði við einum sjálvmáli, tá 73 minuttir vóru farnir.
Mjøndalen er nummar sjey í deildini við 23 stigum.
