Tað eru 11 ár síðani, at Manchester United vann minniligu Champions League finaluna móti Bayern Munchen, tá Teddy Sheringham og Ole Gunnar Solskjær vendu dystinum í evstu løtu. Í morgin hittast risarnir so aftur. Hesa ferð í fjórðingsfinaluni í Champions League.
Hjá Manchester United eru stóru ivamálini Wayne Rooney og Rio Ferdinand. Báðir sótu yvir, tá Manchester United í vikuskiftinum vann 4-0 á Bolton. Nú er so greitt at teir báðir eru við ferðalagnum, ið fór avstað í dag.
Fyri Bayern Munchen er hetta ein møguleiki at hevna tapið í 1999. Millum lyklaspælararnir hjá Bayern eru framrættaðu vong spælararnir Arjen Robben og Franck Ribery. Ribery hevur verið nógv skaddur í ár, men seinasu tíðina er hann komin fyri seg. Tað tykist vera vist, at hann byrjar í annaðkvøld. Verri er við Arjen Robben, ið hevur ein skaða at dragast við og møguliga ikki verður tøkur til dystin.
Fyrra fjórðingsfinalan verður á Allianz Arena í Munchen í annaðkvøld kl 19.45
