Ukrainska orkufelagið, DTEK, skrivar í morgun á Telegram, at eitt russiskt álop á orkuskipanina í Odessa-regiónini hevur ført til sera álvarsligar skaðar.
Úr Ukraina verður sagt, at russar í nátt lupu á við 296 dronum og 29 rakettum.
- Tað eydnaðist okkum at skjóta niður 25 rakettir og 367 dronur, veit ukrainska loftverjan at siga í morgun.
Ukrainski forsetin, Volodymyr Zelenskyj, skrivar á Telegram, at fleiri túsund fólk í Odessa-regiónini hava mist bæði hita og vatn eftir russiska álopið.
Seinastu tíðina hava russar framt óteljandi álop á undirstøðukervið í Ukraina, og russar hava so staðiliga brúkt vetrarkuldan sum vápn móti ukrainska grannafólkinum.
Leggjast kann aftrat, at flogvallirnir í Rzeszow og Lublin í Póllandi vóru stongdi eitt tíðarskeið tíðliga í morgun.
Pólsku loftferðslumyndugleikarnir skriva á X, fyrrverandi Twitter, at orsøkin var hernaðarligur aktivitetur í luftini í samband við russisku álopini á Ukraina.
Lesið eisini:
Póllandi tørvar síni egnu kjarnorkuvápn - https://www.in.fo/news-detail/pollandi-toervar-sini-egnu-kjarnorkuvapn
