Millum 40 og 50 av umleið 70 seingjarplássum á Psykiatriska deplinum á Landssjúkrahúsinum verða nýtt til bústað hjá sjúklingum, sum ikki hava tørv á at vera innlagdir.
Tað staðfestir løgtingsins umboðsmaður Jógvan H. Andreasen, sum tann 24. oktober 2002 var á einari eftirlitsvitjan á Psykiatriska deplinum, í síni ársfrágreiðing.
Orsøkin til, at hesi fólkini búgva á Psykiatriska deplinum sigur leiðslan vera, at eingi onnur bústaðartilboð eru til hesi fólkini. Umboðsmaðurin heldur tað ikki vera nøktandi, at fólk eru innløgd á einum sálarsjúkrahúsi, um teimum ikki tørvar hetta av sjúkuávum.
? Hendan støðan er eftir mínari fatan ikki nøktandi, tí hetta trongir um umstøðurnar á teimum viðgerðarkrevjandi sjúklingunum á deplinum. Um aðrir bústaðarmøguleikar vóru til hesi fólkini, hevði tað verið munandi meira rúmsátt hjá hinum 20-30 sjúklingunum, sigur Jógvan H. Andreasen.
Avleiðingin av plásstrotinum er, at sálarsjúklingar vera stúvaðir saman.
? Eg haldi ikki, at tað er ein nøktandi loysn, at sálarsjúklingar verða stúvaðir saman á hendan hátt, og als ikki tá talan er um 3- og 4-songsstovur, staðfestir umboðsmaðurin.
Umboðsmaðurin hevur biðið Trivnaðarmálaráðið sagt sær, hvørjar ítøkiligar ætlanir eru um at flyta fólkini til egnaðar bústaðir.
