Electro tónleikarin SAKARIS letur í dag nýggja leingi væntaða útgávu frá hondum. Útgávan, ið ber heitið Music Is Never Gonna Make Me Rich, er onnur útgáva í fullari longd frá electro framleiðaranum. Útgávan telur 10 løg og verður givin út á fløgu í húsa, ið Heiðrik á Heygum hevur sniðgivið og Rúna Ingunardóttir hevur broderað, umframt at útgávan eisini er tøk í talgyltum høpi á iTunes og Spotify.
SAKARIS hevur seinastu árini fingið rúma senditíð í føroysku miðlunum og kenna tey flestu allarhelst sera populeru løgini “Brace Myself”, “Score Music” og ikki minst “I Put on This Dress Only for You”.
Seinasta hálva árið hevur hann verið í studio og arbeitt miðvíst við hesi útgávu. Sangirnir eru allir spildurnýggir og fevna um eina mongd av sjangrum, frá stórslignum 80ara dramapoppi til minimalan og kitschutan indiefolk tónleik til nútímans mainstream electro. Um heitið Music Is Never Gonna Make Me Rich sigur SAKARIS at hetta er ein speisk ímynd av støðuni sum fultiðar tónleikari í Føroyum; ein leið, ið ungi havnamaðurin valdi at royna fyri tveimum árum síðani.
Í hesum sambandi verður bjóðað inn til útgávu tiltak í Tutl í dag, fríggjadagin 1. juli klokkan 16. Her verður høvið at fáa sær eina bjór og ein kaffimunn og hoyra nøkur av nýggju løgunum í live høpi. Harafturat fer Sakaris at signera fløgur og hava eitt leyst prát við tey, ið hava hug til tað.
SAKARIS sigur at føroyingar kunnu síggja fram til nógvar feitar framførslur við nýggju løgunum komandi summar.
