Felagið PAM Offshore, ið er dóttirfelag hjá Skipasmiðjuni, hevur í nøkur ár havt starvsfólk í arbeiði í oljuvinnu uttanlands. Higartil hava flest teirra arbeitt í norskari oljuvinnu, har samskattaavtalan millum Norðurlond, sum Føroyar eru partur av, er galdandi. Men við nýggju samskattaavtaluni við Bretland, sum væntandi kemur í gildi 1. januar 2008, hevur PAM Offshore fingið eitt nýtt bein at standa á. Við hesi avtalu skuldu allir skattligir ivaspurningar verið beindir av vegnum, so at føroyingar sum fara til Bretlands at arbeiða, ella bretar sum koma hendanvegin at arbeiða, bert verða skattaðir einaferð samsvarandi teimum reglum, sum eru galdandi í sáttmálanum.
Hetta hevur fingið Gunnar Mohr, stjóra í PAM Offshore, at venda eyguni móti bretska meginlandinum.
- Hendan avtalan opnar møguleikan at senda fólk tann vegin eisini at arbeiða, og vit eru í gongd við at kanna møguleikar, sigur Gunnar Mohr, sum tó ikki vil siga nærri, hvørjar møguleikar tey kanna. Kortini avdúkar hann, at PAM Offshore hevur havt samband við bretskar fyritøkur.
Trot á arbeiðsmegi í Føroyum
Tað eru longu nógvir føroyskir handverkarar, sum arbeiða uttanlands, men í Føroyum eru ikki nógvir útlendskir handverkarar. Í nógvum vinnum er trot á arbeiðsmegi her heima. Tí heldur Gunnar Mohr tað vera av stórum týdningi, at ”latið verður upp í hinum endanum eisini”, sum hann málber seg.
- Vit kunnu sjálvsagt ikki byrgja okkum inni í einari ostaklokku, sigur hann.
Magni Laksafoss, landsstýrismaður í fíggjarmálum, er púra samdur í, at tað hevur stóran týdning at lata upp fyri útlendskari arbeiðsmegi, men undir ”skipaðum viðurskiftum”, sum hann málber seg.
- Tað er stórur eftirspurningur eftir arbeiðsmegi í øllum Evropa, og kemur hetta í kjalarvørrinum á vaksandi eldrabylgjuni (alsamt fleiri gerast eldri, men færri børn verða fødd, blaðm.). Tí er mangul upp á arbeiðskraft ikki bert ein trupulleiki hjá okkum, men í øllum Evropa, vísir hann á.
Men eitt er at lata arbeiðsmarknaðin upp, annað er at syrgja fyri, at ein ikki missur tamarhaldið.
- Tað hevur eisini týdning, at fólkið tekur undir við, at fremmand arbeiðsmegi kemur til Føroya, sigur Magni Laksafoss at enda.
