Í greinastubbanum undraðust vit á, at Samtak stuðlar slíkum fakfelagsskaðiligum virksemi, sum tað er at burturvísa eitt starvsfólk uttan grund.
Sonja Jógvansdóttir sigur, at Samtak einki hevur við málið at gera, og at tað tí er skeivt av okkum at leggja Samtak undir at stuðla slíkum virksemi, og hon heldur, at ein umbering frá okkum er hóskandi.
Tá vit hefta Samtak upp í hetta málið, so er tað tí, at Føroya Fiskimannafelag er partur av Samtaki saman við Føroya Arbeiðarafelag, Havnar Arbeiðsmannafelag, Klaksvíkar Arbeiðsmannafelag og Klaksvíkar Arbeiðskvinnufelag.
Tað var ikki rætt av okkum at siga, at Samtak beinleiðis stuðlar ella hevur stuðlað Føroya Fiskimannafelag, men tað sum vit hava saknað er, at feløgini hava tikið frástøðu frá fakfelagsskaðiliga virkseminum hjá Føroya Fiskimannafelag. Tað hava tey ikki gjørt!
Serliga skerpandi eru umstøðurnar, tá fakfeløg traðka á mest grundleggjandi viðurskifti hjá starvsfólkum, tí er hetta málið serliga áhugavert. Hevði tað verið eitt hvørt vanligt arbeiðspláss, sum soleiðis burturvísti fólki uttan grund, so skuldi fakfeløgini nokk gjørt vart við seg. Vit eiga eisini at minnast til, at starvsfólkið hjá Fiskimannafelagnum ikki ein gong hevur eitt fakfelag at fara til, tí tað er fakfelagið sum er fíggindin. Hvussu kann eitt starvsfólk koma verri fyri?
Vit spurdu Sonju Jógvansdóttir í morgun, um Samtak nú hevur eina viðmerking, ella um hon heldur tað vera í lagi, sum Fiskimannafelagið hevur gjørt.
- Ein burturvísing skal ikki gerast uttan grund, so hatta var skeivt og óumhugsað, sigur hon, men leggur dent á, at Samtak ikki er partur av málinum.
Hon sigur, at hon hevur fingið eina nøktandi frágreiðing frá Fiskimannafelagnum um málið og hevur tikið hana til eftirtektar og hevur annars onga meining um málið. Hon heldur fast um, at tað var skeivt at Sosialinum at linka Samtak saman við hesum máli.
Vit halda enn sum áður at tað er átaluvert, at eitt fakfelag, sum er partur av Samtaki, sleppur at traðka á grundleggjandi fakfelagsrættindini uttan at verða átalað av øðrum fakfeløgum – annars er legitimiteturin hjá fakfeløgunum í stórum vanda.
