Tað sær einki út hjá flokkinum, sum sambært fleiri veljarakanningum síðani síðsta val ikki stendur til at fáa umboðan.
Tað verður óivað lagt trýst á Jógvan Skorheim um at leggja tingsessin frá sær, soleiðis at Kristianna Winther Poulsen kann taka sætið fyri hann. Á tann hátt fær flokkurin eitt triðja fólk, sum kann markera flokkin – samstundis sum flokkurin kann kjølfesta seg aftur í høvuðsstaðnum – og vinna nakrar kvinnuatkvøður og mið-vinstra atkvøður, tí Kristianna Winther Poulsen er ein mótvekt til mið-høgra linjuna hjá Kára Post og Jógvan Skorheim.
Vit gita, at Jógvan Skorheim fer at varðveita løgtingssessin. Borgarstjórar hava ofta stórt vald á løgtinginum, og tað er tí at borgarstjórar í løgtinginum hava manererað soleiðis, at borgarstjórar sleppa at sita á tingi, hóast teir eru í almennum fulltíðarstarvi sum borgarstjórar. Tað var Jógvan við Keldu sum í síni tíð fekk tryggjað borgarstjórum hetta beinið.
Við borgarstjóraløn og løgtingsløn og skattafríum ágóðum, so verður Jógvan Skorheim hægst lønti politikari í Føroyum saman við javnaðarmanninum á Tvøroyri, Kristin Michelsen. Teir liggja um 100.000 krónur um mánaðin – so hví forspilla sær ein slíkan kjans?
Og klaksvíkingar vilja heilt víst hava sín borgarstjóra á tingi – og hann skal kára seg ómetaliga illa sum borgarstjóri, um klaksvíkingar ikki velja hann á ting næstu ferð.
Skorheim er tí framtíðarvónin hjá Sjálvstýrisflokkinum.
