Norðurlendskt grannabrak millum Svøríki og Danmark hevur í kvøld verið á skránni á Friends Arena í Stokhólm.
Svøríki og Danmark dystaðust nevniliga í play-off dysti um hvat av liðunum skal spæla seg til EM í Fraklandi komandi summar.
Svøríki vann dystin 2-1, eftir at teir leingi høvdu verið á odda 2-0.
Sum heild var Svøríki greitt omaná størsta partin av dystinum, og tað var ikki fyrrenn tað seinasta korterið at Danmark av álvara kom við í dystin.
Tað var serligu báðu megin hálvleikirnar at Svøríki avgjørdi dystin. Emil Forsberg legði Svøríki á odda 1-0 stutt áðrenn dómarin bríkslaði til hálvleik, og tveir minuttir eftir at seinni hálvleikur var byrjaður, økti svenska stjørnan, Zlatan Ibrahimovic til 2-0 við brotssparki. Hetta var samstundis eisini fyrsta málið hjá Zlatan Ibrahimovic nakrantíð ímóti Danmark. Nakað sum hevur fylgt nógv í fjølmiðlunum seinastu dagarnar.
Ímóti endanum av dystinum eydnaðist tað Danmark at minka um munin. Eftir eitt longt hornaspark, stóð innskifti Nicolai Jørgensen á rætta staðnum, soleiðis at Danmark fekk eitt gott útgangsstøðið við sær til Danmarkar.
Seinna og avgerandi uppgerðin millum Svøríki og Danmark verður leikt í ítróttarparkini í Keypmannahavn týskvøldið.
Svøríki – Danmark 2-1 (1-0)
1-0 Emil Forsberg, 45.
2-0 Zlatan Ibrahimovic (Brotsspark), 47.
2-1 Nicolai Jørgensen, 80.
