Ísraelska stjórnin var fyri hvøssum atfinningur seinasta heyst, tá herurin fleiri ferðir beindi fyri leiðandi monnum í ymsum palestinskum felagsskapum. Fleiri lond mótmæltu framferðini og skýrdu framferðina beinleiðis avrættingar.
Seinastu tíðina hevur eingin tílík avrætting verið, men mánadgin doyði ein av leiðarunum í felagsskapinum Fatah av einari bumbu, sum ísraelsmenn høvdu lagt.
Palestinskar keldur siga, at Read al-Karmi doyði av einari bumbu, sum lá uttan fyri eini hús í býnum Tulkarm á Vestara Áarbakka, har Fatah-leiðarin hevði fjalt seg seinastu tíðina.
- Ísraelsmenn løgdu bumbuna tætt við eina girðing. Onkur ringdi til al-Karmi og bað hann far úr húsunum, har hann fjaldi seg. Tá hann nærkaðist girðingini, brast bumban. Read al-Karmi doyði beinanvegin. Hetta var einki annað enn ein beinleiðis avrætting, siga palestinsku myndugleikarnir.
Ísraelska herleiðslan hevur sýtt fyri at gera nakrar viðmerkingar til upplýsingarnar hjá palestinsku myndugleikunum.
