Fyrradagin, skírisdag, bórust boðini um, at hollendska fótbóltslegendan, Johan Cruyff, var deyður av krabbameini. Hann gjørdist 68 ára gamal.
Cruyff er høgt virðismettur kring heimin, kanska serliga í heimlandinum Hollandi, har hann í gjár fekk eina vakra heilsan í venjingardystinum ímillum Holland og Frakland.
Dómarin steðgaði dystinum tá ið 14 minuttir vóru spældir, so øll á leikvøllinum kundu reisast og klappa fyri Johan Cruyff, sum spældi við ryggnummari 14.
Eftir dystin, sum endaði 3-2 til Frakland, boðaði hollendska fótbóltssambandið frá, at ætlanir eru um at umdoypa Amsterdam Arena til Johan Cruyff Arena.
