Í morgun veit Sermitsiaq at siga, at fráboðaða ódnin, sum væntandi fór at raka grønlendska býin, Tasiilaq, í gjár, gjørdist rættiliga hørð.
DMI ávaraði um, at vindurin í hvirlum kundi koma upp ímóti 50 metrum um sekundið, og hesar metingar gjørdust eisini veruleiki í gjár.
Á sínari heimasíðu veit DMI at siga, at tá vindurin var mestur, vóru 34 metrar um sekundið - og í hvirlum upp í 53 metrar um sekundið.
Grønlands Politi sigur, at ógvusliga veðrið í Tasiilaq hevði við sær, at 47 fólk noyddust úr húsum sínum, harav 30 vórðu flutt í felagshúsið í býnum.
- Orsøkin til, at neyðugt var at flyta fólk úr húsum sínum, var, at fleiri rútar fóru í knús, sigur løgreglan.
Ein av familjunum, sum noyddist úr sínum húsum í ringa veðrinum, hevði eitt sjúkt barn, og hendan familjan varð flutt á sjúkrahúsið.
Grønlands Politi hevur onga fráboðan fingið um, at ódnarveðrið í Tasiilaq hevur elvt til persónsskaðar.
Sambært løgregluni er vindurin minkaður í morgun.
Á sosialum miðlum skriva fleiri fólk í grønlendska býnum, at veðrið var óvanliga ringt, og sagt verður frá skaðum á hús, bilar og jollur.