Tað hevur í dag verið óvæntað stórur spenningur í kappingini um, hvørt tað skuldi verða AB ella TB, sum skuldi flyta upp í bestu deildina saman við FC Suðuroy.
Uppgávan hjá AB á heimavølli sá lættari út enn avbjóðingin hjá TB á útivølli, og AB hevði betri fyritreytir enn TB..
AB hevði vitjan av longu niðurflutta FC Hoyvík, og TB var á útivølli ímóti EB/Streymi sum síðani summarsteðgin hevur syrgt fyri, at liðið eisini næsta ár verður í 1. deild.
At tað gjørdist so tætt og intenst komst av, at TB rættuliga gjørdi um seg við Margáir. TB legði fyri sum eitt ódnarveður, og TB vann 11-0! Og tað var nóg mikið at flyta upp við.
Tað gekk striltið hjá AB at fáa hol á, men so glapp, og AB var á odda 6-0, inntil tað bara restaði ein lítil løta. Tá minkaði FC Hoyvík um munin, so dysturin endaði 6-1, og tað var akkurát ikki nóg mikið at flyta upp við.
Dysturin á Argjum var liðugur, áðrenn dysturin við Margáir, og tí var einki annað at gera hjá teimum á Argjum enn at bíða, inntil dysturin við Streymin var liðugur.
Langt eftir dystarenda á Argjum varð brotsspark dømt til TB, og tað skoraði TB uppá. Harvið vunnu tvøramenn 11-0, og tað var akkurát nóg mikið at flyta upp við.
Bæði TB og AB endaðu við 61 stigum. Málmunurin hjá báðum liðum var +55, men TB flytir upp, tí TB hevur skorað fleiri mál enn AB. TB hevur skorað 81 mál, og AB hevur skorað 80 mál.
FC Suðuroy-07 Vestur 7-0
AB-FC Hoyvík 6-1
EB/Streymur-TB 0-11
NSÍ-Skála 0-8
HB-Víkingur 4-2
Endaliga støðan
FC Suðuroy 70
TB 61
AB 61
Skála 40
NSÍ 38
HB 33
Víkingur 31
EB/Streymur 31
FC Hoyvík 26
07 Vestur 0
