Í dag er tíðindadeildin hjá grønlendska kringvarpinum - KNR - ikki til arbeiðis, og hetta hendir mitt í grønlendska valstríðnum til landstingið.
Sambært Sermitsiaq hava tíðindafólkini boðað leiðsluni frá, at tey møta ikki til arbeiðis í dag.
- Vit eru ein bólkur á 16 fólk á tíðindadeildini hjá KNR, sum niðurleggja arbeiði, siga starvsfólkini í tíðindaskrivi í gjár.
Sermitsiaq veit at siga, at KNR seinastu mongu árini hevur havt avbjóðingar við starvsfólki.
- Síðan á nýggjárinum er trýstið á tíðindadeildina vaksið, tá fleiri hava sagt seg úr starvi ella eru vorðin sjúkrameldað fyri strongd. Tískil hava tey, sum eftir eru á deildini, ligið undir einum enn størri arbeiðstrýsti.
Bólkurin, sum hevur sagt, at tey leggja arbeiðið niður á KNR í dag, vísir á, at beint í løtuni eru bert fýra starvsfólk til at gera uppgávuna hjá 12 fólkum.
Sambært Sermitsiaq ávirkar støðan á KNR eisini restina av tíðindadeildini, har eisini aðrar redaktiónir vanta starvsfólk.
Meira um hetta kann lesast á hesi leinkju - https://www.sermitsiaq.ag/samfund/nyhedsafdeling-i-knr-nedlaegger-arbejdet/2201152
