Eyðun Mohr Viderø
Eg havi eitt sindur ilt við at skilja, hvar munurin er millum tey, ið neyðugt er at nevna í lógartekstinum, og so tey ið ikki er neyðugt at nevna serskilt, fyri at fólk kunnu verða vardur ímóti ágangi av hvørjum slag, tað so er.
Vit eru gjørd kunnug við, at í einum ávísum føri hevur persónur verið fyri ágangi fyri sín kynsliga verumáta bæði í orðum og kropsligari viðferð, men sagt verður, at politiið ikki kann reisa ákæru, tí mál sum hetta er ikki greitt nevnt í revsilógini!!??
Hvat eigur so at verða gjørt í okkara rættarsamfelag, so tílíkt ikki kann gerast óstraffað? Sjálvur eri eg ikki nóg lógkønur at taka avgjørda støðu um hetta, men ymiskar loysnir hava verið nevndar av okkara lóggevarum í lógarsmíi.
Í hvussu so er útnevndu tveir politikkarar seg sjálvar til talsmenn og verjar fyri tey homoseksuellu, at greinin í donsku revsilógini hesum viðvíkjandi eisini skuldi vera galdandi í Føroyum, og tí komu tey við uppskoti um hetta.
Verri gekst, tá málið kom fyri løgtingið. Nú fóru onnur í herna ímóti uppskotinum, tí hetta serskilda átak beinleiðis stríðir ímóti ásetingum og siðalæru í Halgubók.
Hvar eru vit nú stødd?
Flestu okkara eru samd um, at náttúrliga sambandið millum kynini er millum mann og kvinnu.
Tíverri er tað soleiðis í ávísum førum, at nøkur ikki hava hetta náttúrliga sambandið kynjanna millum, og sagt verður, at tú hevur ikki avgjørt hetta sjálvur, men er “føddur” soleiðis.
Aðrir trupulleikar hjá fólkum eru eisini at síggja í hesum “fødda” høpi, sum t. d. at onkur hevur trupulleikar av alkoholi, sum viðkomandi er “føddur” við, onnur við tjóðalyndi o.s.fr.
Okkara siðasinni sigur okkum í nógvum førum, hvat vit skulu halda um alt, men í flestu førum mugu vit hava okkurt at stiðja okkum til, fyri at vera før fyri at taka støðu, og mær kunnugt er onki tryggari enn okkara bíbil, hóast okkara vesælu evni at fylgja henni!
Tí haldi eg, at tað er skeivt at siga, at tað ikki er rætt at halda politikk og skriftina saman, men hetta skal ikki skiljast sum tað sama sum at halda politikk og átrúna saman! Tá verður pappírið í bíbliuni nýtt til at sláa hvønn annan við, meðan innihaldið ikki er við!
Rok hevur staðist í Tjóðveldisflokkinum, tí flokkurin er skildur, tá Karsten Hansen sambært síni andaligu sannføring ikki kundi fylgja restini av flokkinum, men meldaði seg út. Karsten verður hildin vera ein róligur og heiðurligur persónur, sum ikki tekur sovorðin stig fyri at gera seg sjálvan upp.
Í dimmalætting 19. des. verður formaður floksins Høgni Hoydal endurgivin fyri at siga, at tað er “bæði ørkymlandi og álvarsligt, um vit fara at býta løgtingslimir upp eftir trúgv..” og “Vit skulu taka avgerðir um politikk og ikki átrúnað.”
Tingmaður floksins í Sandoy hevur ásannað, at hann kundi fáa trupulleikar við baklandið – veljarar - men hann vildi fylgja síni sannføring og atkvøddi fyri uppskotinum!
Tjóðveldisflokkurin hevur havt størri trupulleikar enn aðrir flokkar í hesum føri, men tíverri sær út til at teir ikki hava henda trupulleika, tá Karsten er farin.
Nú hoyrist í fjølmiðlunum, at avgerðin hjá løgtinginum skal sendast til fólkaatkvøðu, vísandi til áseting í uppskotinum til stjórnarskipan Føroya, sum hvørki er samtykt av løgtingi ella fólkinum.
Tað er helst bert hetta, ið vantar í, at hurlivasin er fullkomin!
20.12.06
