Tað var fyrr í vikuni, at Sosialurin vísti á, at Kringvarpið ger seg inn á rúsdrekkalógina við at burturluta sterkt øl frá okkara fyri at lokka fólk at vitja heimasíðuna hjá Kringvarpinum.
Men í morgun var eingin lýsing um øl frá Okkara. Nú var ølsponsorurin skiftur út við hitt bryggjaríið, Føroyar Bjór.
Um tað er av tilvild ella ikki, vita vit ikki. Men tætt samband er millum Kringvarpið og Føroya Bjór, tí fremsti mentanarstovnur landsins hevur sama nevndarformann sum fremsti ølbryggjari landsins. Og hví so ikki fáa synergiina at rigga fult út?
Tað er politiskur vilji og politiskt ynski, at Kringvarpið skal fíggjast við lýsingum – og at Kringvarpið skal kappast á ójøvnum og ósolidariskum grundarlag við privatu miðlarnar. Tá so handilsligu áhugamálini hjá nevndarformanninum sampakka so væl, sum í hesum føri, so er tað so líka til, at Føroya Bjór eisini fær gratis reklamu – áðrenn Jenis ella Bill steðga rúsdrekkalýsingunum í Kringvarpinum.
Vit trúgva í øllum førum ikki uppá, at nakar politikari torir at siga, at handilslýsingar hoyra heima í privatu miðlunum. Líka so lítið, sum teir hava rygg til at geva Kringvarpinum tær fíggjarligu sømdir, sum ein slíkur mentanarstovnur hevu uppiborið.
Tí verður einki skil í, stovnurin verður niðurpíndur, og uppgávan hjá Dia Midjord verður at finna útav, hvussu hann kann spara og uppsiga fólki fyri at nærkast upp á nullið.
