Grønlands Politi kannar nú tvey deyðsføll á einari og somu adressu í grønlendska býnum, Tasiilaq.
Í stuttum tíðindaskrivi sigur løgreglan, at talan er um tvey illgrunaverd deyðsføll, sum tey nú eru í holt við at kanna.
Tað var stutt fyri middag grønlendska tíð í gjár, at Grønlands Politi fekk eina fráboðan.
- Fráboðanin førdi til, at tvey fólk stutt eftir vórðu funnin deyð á einari og somu adressu í Tasiilaq.
Løgreglan er í holt við kanningararbeiðið, og tey halda, at talan er um illgrunaverdar umstøður.
- Av tí, at hetta er hent so nýliga, kunnu vit ikki gera fleiri viðmerkingar til málið í løtuni, sigur Grønlands Politi.
Løgreglan leggur tó aftrat, at bæði deyðsføllini verða kannað.