U21-landsliðið fyrireikar seg í hesum døgum til landsdystin móti Póllandi, sum verður fríggjakvøldið í Lubin í Póllandi. Í dag hevur liðið vant í Legnica í suðurvestur Póllandi. Eli Hentze, U21-landsliðsvenjari, hevur skrivað nøkur orð um venjingina, sum bleiv kryddað av póllendingum, sum kenna væl til Føroyar.
Eli Hentze skrivar: Kvøldarmyrkrið komið og ferðin til nýggjan dag er byrjað her í Legnica í suðurvestur Póllandi. Sólin vermdi kaldar norðuratlantshavs kroppar fyrrapartin, tá ið venjing var á skrá á frálíkum grasvølli beint við stadium í býnum.
Góða venjingin var eisini kryddað við hugaligari vitjan av pólverjum, ið kenna væl Føroyar. Janusz Pekowski, sum í nakrar mánaðir um miðjan 90 árini, vandi EB/Streym, er og fylgir gongdini hjá U21 landsliðnum. Eisini stinni verjuleikarin, Andrezj Pacek, sum í nógv ár leikti við EB/Streymi, var á vitjan. Andrezj býr í Legnica, men arbeiðir enn í Føroyum. Føroyska tungan er stinn, eiðismálið hoyrast væl. Niðurteljinin til 8´anda og triðseinasta EM-undandystin á hesum sinni er av álvara byrjað.
Dysturin móti Póllandi er fríggjakvøldið 7.september kl. 18.00 (17.00 fø. tíð) á Zaglebia Lubin leikvøllinum í Lubin. Eli Hentze leggur afturat, at ongin skaði er í hópinum. Tí kann U21-landsliðsvenjarin velja millum annað úttiknu spælararnar:
Rói Mørk Hentze, B36
Karstin Hansen, Skála
Jóannes Kalsø Danielsen, KÍ
Ari Olsen, Skála
Bjarni Petersen, B36
Bartal Wardum, HB
Ólavur Niclasen, KÍ
Erlendur Magnusson, B36
Betuel Hansen, NSÍ
Jákup Biskupstø Andreasen, KÍ
Benjamin Heinesen, B36
Dan í Soylu, HB
Steinbjørn Olsen, KÍ
Jóannes Bjartalíð, KÍ
Petur Knudsen, NSÍ
Meinhard Egilsson Olsen, B36
Búi Egilsson, TB/FCS/Royn
Jákup Ludvig Thomsen, FH (ICE)
