Í morgun skriva útlendskir miðlar, at ukrainski stjórnarherurin hevur tikið býin Tsjuhujiv har eysturi í Ukraina aftur frá russum.
Tíðindastovan NTB, sum endurgevur BBC, veit at siga, at harðir bardagar hava verið í býnum, har russar hava mist nógv fólk og útgerð.
Upplýsingarnir eru ikki váttaðir av óheftum keldum, men sagt verður, at tveir týðandi russiskir herovastar eisini hava latið lív í bardøgunum.
Í býnum Tsjuhujiv, sum liggur umleið 37 kilometrar frá næst størsta býi í Ukraina, Kharkiv, búgva umleið 30.000 fólk.
Kharkiv hevur annars verið undir áhaldandi álopum frá russiskum herdeildum í fleiri dagar.
