TRÝST á PÍLIN undir MYNDINI, og hoyr samrøðuna Petur Zachariassen hevði á Rás2 seinnapartin við Katrina Eivindsdóttir Danielsen, sum er PhD í Developmental Biology frá University College í London.
Í samrøðuni greiðir Katrin Eivindsdóttir Danielsen frá einari umfatandi verkætlan, sum hon hevur í samstarvi við læknan, Ulrike Steuerwald og Ron Wevers, professara úr Niðurlondum.
Sambært Katrini Eivindsdóttir Danielsen er endamálið við verkætlanini at finna og viðgera allar nýføðingar í Føroyum føddir við m.ø. CTD og Glykogen goymslubreki (GSDIIIa).
Hesar sjúkur hava høgan títtleika í Føroyum samstundis sum verandi kanningarhættir ikki eru nóg neyvir ella, fyri GSDIIIa, als ikki eru til. Ábendingar eru um at fleiri børn detta ígjøgnum núverandi skreening, ið hevur til endamáls at finna øll børn áðrenn tey verða sjúk. Børn og ung ið ikki fáa viðgerð kunnu blíva álvarsliga sjúk og doyggja.
Mett verður, at vit hava tørv á einari skipan í Føroyum sum við høgari vissu kann staðfesta sjúku á ein lættan og bíligan hátt. Fyri at røkka hesum endamáli fara vit at seta á stovn ein nýggjan kanningarhátt í Føroyum ið sjótt og neyvt kann staðfesta tey ílegufrábrigd (mutatiónir) ið elva til sjúkurnar. Kanningarhátturin kann nýtast av øðrum granskarum og ríkar um granskingarumhvørvið í Føroyum.
Annað endamálið er at kanna 1000 føroyingar fyri ílegufrábrigd ið kunnu elva til sjey álvarsligar, deyðiligar sjúkur í Føroyum. Hesar umfata millum annað Føroya sjúku/SUCLA2. Við at kanna hvussu nógvir føroyingar bera frábrigdi fara vit at varpa ljós á trupulleikan av høga títtleikanum av deyðiligum sjúkum í Føroyum, og mannagongdir uttanlands viðvíkjandi fyribyrging av hesum, greiðir Katrin Eivindsdóttir Danielsen frá.
