Anna Arabo
Hettar er fyrsta byggistigið, og tá ið teir fyrst eru byrjaðir, so verður næsta byggistig, og tað er ein moli heilt út til bátahylin á Signabø sum tekningar vísa.
Tá verður ikki livandi fyri larmi, hvørki fyri fólk ella fæ. Borgarstjórin var nú ein morgunin í kringvarpinum og segði, at nú fóru teir undir at kanna, hvussu nógv tað larmar í Kollafirði, men hann gloymdi at siga, at teir høvdu flutt russarnar inn á Sund at liggja meðan kannað verður.
Vit hava klagað allastaðni, hvar vit kunnna og 13/10 – 2005 var fundur í Bygdarhúsinum í Kollafirði, sum borgarar her norðuri tóku stig til. Frá Tórshavnar býrað møttu Heðin Mortensen, Leivur Hansen, Jens Marius Poulsen og Jónsvein Lamhauge. Úr Kollafirði vóru ca 100 fólk og øll vóru bilsin um ætlana hjá Tórshavnar býrað um hesa veldigu havn, tí øll her høvdu fingið at vita, at talan bara var um ein lítlan kaikant. Leivur Hansen helt fyri: Jamen tað eru bara átta Kollfirðiringar sum hava klagað.
Um sama mundið klagaðu 14 havnafólk um ein veg, og tað var tikið til eftirtektar, men tað vóru borgarar í Havn, og vit eru bara kollfirðingar. Nú hava vit so fingið umleið 200 undirskriftir, men líka lítið hjálpir tað.
Á býráðsfundi mánadagin 23/4 reisti Høgni Mikkelsen seg upp og helt so niðurgerandi fyri, at man kundi ikki lurta eftir klagu frá so fáum fólkum, tað høvdu teir ikki tíð til. Eg visti ikki, at rættindi hjá borgarnum verða mett eftir, um tað eru nógv ella fá, talan er um.
Hevði væntað, at Elin Lindenskov fór at vera ímóti bingjuhavnini, tí hon er formaður í umhvørvisnevndini, men har blivu vit øll skuffaði, sum vóru á fundinum. Men umhvørvislógir eru kanska bara fyri Tórshavn!
Eitt vita vit, bingjuhavnin gevur ongi nýggj arbeiðspláss, tvey í mesta lagi. Høvdu tey fimm virkini, sum søktu um loyvi frá Tórshavnar Kommunu, fingið loyvi at bygt á íðnaðarøkinum Oyrareingjum, so høvdu vit havt um 100 ella meir arbeiðspláss á Oyrareingjum og ongan larm aftan á kl 6 um kvøldið.
Eina stóra tøkk til Beatu L. Samuelsen. Hon var tann einasta í Tórshavnar Býráð, sum tosaði okkara søk.
Flaggdagsrøðan hjá Heidi Petersen løgtingslimi í Kollafirði flaggdagin var góð. Hon heitti á kollfirðingar um at reisa seg ímóti, at gerast køstur hja Havnini. Eg eri so púra samd. Nú kunnu vit vóna, at landspolitikarnir fara at tryggja verju av nærumhvørvinum.
Tit smáu kommunir hugsið tykkum væl um, áðrenn tit leggja saman við størri kommunum. Vit hava ringar royndir.
