USA hevur skrivað undir handilsavtalu við Vietnam, sum merkir, at vjetnamesiskar vørur fáa ein eykatoll uppá í minsta lagi 20 prosent.
Samstundis letur Vietnam sín marknað upp fyri amerikanskum vørum.
Tað boðaði amerikanski forsetin, Donald Trump, frá í dag.
- Teir fara at lata sín marknað upp fyri USA, sum merkir, at vit sleppa at selja okkara vørur í Vietnam við NULL tolli, skrivar Trump á sínum sosiala miðli, Truth Social.
Avtalan er gjørd eina viku áðrenn freistina hjá Trump, sum er 9. juli, hetta er dagfestingin, tá hægri tollur kemur í gildi fyri eitt stórt tal av amerikanskum handilspartnarum, um ongar avtalur verða gjørdar.
Millum stóru handilspartarnar, sum enn ikki hava gjørt avtalu við Trump, eru ES og Japan.
Í kvøld segði varafíggjarmálaráðharrin í USA, Michael Faulkender, at helst verða fleiri avtalur gjørdar komandi vikuna.
- Eg rokni við, at vit í næstu viku sleppa at leggja eina røð av avtalum fram, segði hann í samrøðu við sjónvarpsstøðina CNBC.
- Fyri londini, har samráðingarnar ikki veruliga hava gingið framá, vildi eg væntað eina fráboðan í næstu viku um tollprosentið, tey fáa.
Í apríl hevði Trump boðað frá einum tolli upp til 46 prosentum á vørum úr Vietnam.
Hann lækkaði tað til ein "grundtoll" uppá tíggju prosent fyri flestu lond.
Nú avtalan júst er gjørd, verður tað nú 20 prosent á vørum, sum koma beinleiðis úr Vietnam til USA, meðan vørur, sum fara ígjøgnum triðjalond á leiðini, verða undir tolli uppá 40 prosent, boðaði Trump frá.
Vietnam hevur sostatt »slakað rættiliga ógvusliga fyri USA«, heldur leiðandi høvuðsráðgevin Peter Bay Kirkegaard, sum er arbeiðir fyri Dansk Industri í Washington.
- Um henda avtalan setir markið fyri, hvat USA fer at krevja av sínum handilspartnarum, eitt nú ES, so er trupult at síggja, hvussu endarnir verða gjørdir upp, segði hann í skrivligari viðmerking.
Ritzau/Reuters
